Read BIBILLYA Mareiyo Meele a Iruva YUUKA 22 Bible Online

YUUKA 22 - BIBILLYA Mareiyo Meele a Iruva bible

YUUKA 22

¹Kwakooya nndu eeva shau ao yoonri na ilyishisha, ao ilikumba, mmbo ashetaa shau isaanu ando a shau imwi, na moonri aana ando a yoonri lyimwi.

²Kwakooya inyinyi lyaaramwa lyikunndye ifisha ando, nawe kakapwa kutani afwa, nndu yeto samu yakwe nnyishetawaa-fo.

³Indi kwakooya kwankya, samu yakwe ishetawaa.

⁴Na kwakooya kindo ekyo kyileewa kyankooywa maakony akwe kyikee na muu, kiwe ni ng'umbe ao nshungu, ao yoonri mmbo ataa uuru lwa vayo kavii.

⁵Kwakooya nndu akeeyiisa findo efo ireminy lya misabibu, kara kindo kyakwe kyikalya ireminy lya nndu ungyi, mmbo ashetaa na findo fyooka ireminy lyakwe muni ao fya misabibu yakwe.

⁶Kwakooya nndu aata muro ukakora ngorosho ukalambukya na nganu shifinge ao tikee ireminy tilakee shivyaa na irema lyikasarumya, yeto apokaa muro eto nkuti nataa.

⁷Kwakooya nndu aakuya ungyi fesa ao kindo kive nansurumyi, na findo efyo fikaivyo efo mmba kwa nndu yeto, eto mwiiva kantiro nkuti nataa kavii wuuru lwa findo efyo.

⁸Kwakooya yeto mwiiva nalamanyika, yeto muni mmba nkuti nashe mbee ya Iruva naoore sheelyi nshiwe aleipoo findo fya urooye-fo.

⁹Wo kindo kitirwa nyinyira, kwakooya ni wa shau, ao nshungu, ao moonri ao soori ao kindo kyoose kirekye, ao nndu akeekapannya kaamba, “Yeki,” mwaandu yeto wa vandu vavii ni kuti weendwa mbee ya Iruva, neeto Iruva ashemoolonngyaa mmbwe mwiirenga, we mmbwe ashetaa yeto ungyi kindo ekyo kavii.

¹⁰Kwakooya, nndu aniingya uroye nshungu ao ng'umbe, ao yoonri ao kindo kingyi kyoose sheelyi amwaarya, kindo ekyo kikafwa, ao kikalwaa, ao kikaiwa

¹¹llyo vandu yewo vashekulyisaa mboo mbee ya Iruva kyeyoora sheelyi nnyaleipoo kindo kya uroye-fo, na muni wa vayo nairikkye nare nalatawa.

¹²Kyeendi kindo ekyo kwakooya mmbo kileiwa nkuti natae uroye.

¹³Kyeendi kwakooya mmbo kileratuwa ni ifisi, mmbo akyeende noore kive ukureeki nnyashetaa kimaruma kya ekyo kileratuwa ni ifisi-fo.

¹⁴Kwakooya nndu aarywa kindo, nakyo kikawonisa nrenga, ao kikafwa, muni nalaiyo kuti natawa.

¹⁵Lyo kwakooya yeto muni eeiyo nnyashetawaa-fo, kwakooya ni kindo kyekeerunda mashora, mmbo kileenda indo kyikee mashoreny eetawa.

¹⁶Kwakooya nndu atuusa mwana wa kyika atiri tindi yakwe nawe kalala nawe, ni kuti naute findo fya ukwe nave nka wakwe.

¹⁷Kyeendi kwakooya ndeye alema deny iniinngya mwana wakwe, mmbo ashetaa fesa tiinani na masaa yoo akwe.

¹⁸Nka nsavi nalarewa na muu-fo.

¹⁹Nndu moose ashetuusa na ifisi nkuti naawaa-wa.

²⁰Nndu moose yeto asherasyaa maruva engyi kuuta we Nndumi Iruva nkuti narumatwa deny.

²¹Kulalammyi muny-fo, nta kulantannyi fya kiila-fo, mashika naakwa ni yeni mwekee veny kulya Misri.

²²Kulalyise ukiva nka wa ding'u nta mwana wa ngwera-fo,

²³Kwalyisa ukiva vandu va ngata yeyo nawo vakashiwuiya, ni dede nkuti shiite kiiyo kyawo,

²⁴na unyafi lwakwa ni kuti lusaami neeny mmbo mshemuwaa na usu, na vaka vany nawo vasheva vaka va ding'u, na vana vany varewa ngwera.

²⁵Kwakooya kwaakuya nndu nkiva kindo, efo vanduny vakwa, kulashemwava siye yeyo na mbusha ya vayo-fo.

²⁶Kwakooya nndu akurekya soori yakwe nkuti kuimbiirye kulore kwammila,

²⁷mashika soori yeyo ni isara lyakwe lyeesika mwiili, kilammba indo mmbo ashelaaya-kyi? Mashika kyeeri asheshifuyaa nkuti shimwiirikye mashika yeny shikee mwilyillya.

²⁸Kulaara-re Iruva-fo, nta kuladenge nsongoru wa vandu vafo-fo,

²⁹Nta kulakyeeyo yeende fimu fyafo fya mbee. Vana vafo va mmbee mmbo kusheshiningyaa yeny.

³⁰Neewe mmbo kushetanaa indo efo shauny tafo, na moonriny afo, mmbo kushefiraa na maye ando a mikonu mfungare nkonu wa nyanya llyo kushiutye.

³¹Neeni mmbo mushevaa veele kwakwa yeny, kweekyo mulalye nyama ileratuwa ni ifisi efo ureny-fo, nyama ya vayo mmbo musheyeryaa fite.