Read BIBILLYA Mareiyo Meele a Iruva YUUKA 25 Bible Online

YUUKA 25 - BIBILLYA Mareiyo Meele a Iruva bible

YUUKA 25

¹Nndumi Iruva karera na Mose kammbia,

²Via vana va Israeli vashuutye firaso, wo nndu yeto nrima wakwe wammuruma muwarye kwakwe kiraso kyakwa.

³Na firaso mushewaryaa efo kwawo nfyo efi, saabu na fesa na minya ya arera.

⁴Na nruu ta fwana idodorye na ta sambarau, na soori ta, ruu, na mafwaa a mburu,

⁵na masara a suva maambe fwana idodorye, na shonyi ta pomboo na miri ya mshita,

⁶na mafura a taa yeyo na mafura afwaama ekwaamba,

⁷Mushisongosye soori ya iraa ya shohamu ya mbafuny ishevikwa-fo naivera.

⁸Nawo vandesongosya ando kweele kuve ni ando kwekaa nnang'ani yaawo.

⁹Efi fyoose ndesa shammaa imoora kiringisyo ni indo mushekoyaa ifitana.

¹⁰“Songosya isanduku lya nri wa mshita waasha lwa vayo luve marambo avii na kyenga na ivari lya vayo irambo lyimwi na kyenga na yeenda uwe irambo lyimwi na kyenga da.

¹¹Neewe kulyisikye na saabu efo mbai koose.

¹²Neewe mmbo kusongosyaa nrashi yiinya kuvike marende yoo a vayo nrashi ivii taari imwi na ivii taari ingyi.

¹³Neewe vika ngo shaasha ta nshitaa na iisikkya na saabu.

¹⁴Neewe vika nrashi tilya tikee efo taariny ivii ta isanduku naambo teekkye yiiboo isanduku elyo.

¹⁵Ngo eto mmbo tikaa efo nrashiny eto ta isanduku, tilauto-fo-fo.

¹⁶Kwammaa vika maboo amma efo isandukuny elyo nshekuningyaa.

¹⁷“Neewe mmbo kusongosyaa kitima kya saabu shisha, kitima kya isarya waasha lwa vayo marambo avii na kyenga na ivari lya vayo sentimita makumi aana na isaanu.

¹⁸Neewe songosya makerubi avii a saabu kyive ni ishora lya maako, kuvike yoo kiriny ekyo kyeelyillya taari na taari.

¹⁹Vika Kerubi lyimwi mbai yei na lyingyi mbai yeyo ingyi, songosya a ngata imwi na kiri kyesaria, taari yei na taari yei.

²⁰Na yoo mmbo ashiipoiyoo maaru uwe, neesikkya kitima ekyo kyesarya na maaru awo, na fisangu fyawo fikulole, yeu na yeu, fisangu fya ewo mmbo filolaa kiri ekyo kyesarya.

²¹Vika kiri ekyo kyesarya yoo uwe ya isanduku elyo, llyo kushevikany ukureeki elo nshekuninngyaa efo isandukuny elyo.

²²Na yoo ng'u nshekwanannyaa neewe, neerera neewe yoo shikai uwe ya kiri ekyo kyesarya, nnang'ani ya vayo yoo kukee uwe ya isanduku elyo lya mma, findony efyo fyoose nshekuvavasyaa kimaruma kya, vana va Israeli.”

²³Neewe mmbo kusongosiaa mesa ya nri wa mshita, waasha lwa vayo maako avii, na ivari lya vayo woko lumwi, na yeenda uwe woko lumwi na kyenga.

²⁴Kuisikkye na saabu shisha, kuiringitye na saabu taari toose.

²⁵Kuiringitye na urungo taari toose, ivari lya vayo marambo aana, na urungo lulya kulutokope na saabu efo mbai ya vayo taari toose.

²⁶Kuisongosie fipulyi fiina fya saabu, kuvike fipulyi efyo yoo mbai eto yiinya yoo marendeny a vayo aana.

²⁷Fipulyi efo fivii fikee kufii na urungo elo, kuve ando eevika firi filya fya yiipoo mesa eyo.

²⁸Vika firi efyo fya nri wa mshita, neefisikya na saabu, five fya yiipoo mesa eyo.

²⁹Neewe songosia saani tavayo, na miriko ya vayo na makopo a vayo, na fikombe fya vayo fyeletya, fyoose fisongosie na saabu shisha.

³⁰Neewe mmbo kushevikaa mikate eyo ya yoora yoo meseny mbee yakwa kyeeri kyoose.

³¹Neewe songosya kirembo kya taa kya saabu shisha, kirembo ekyo kisongosywa ni mfuru, kirembo kya vayo, na kiri kya vayo, fikombe fya vayo, utore lwa vayo, fyoose mmbo fivaa fya ngata imwi.

³²nakyo mmbo kishetiraa maako arindaru ookye yoo mbee ya vayo, maramba araru a kirembo taari imwi na maramba araru a kirembo ekyo taari ya kavii.

³³Wo iramba lyimwi, mmbo lyishevaa na fikombe firaru fivakkye kivaro kya mlosi wo lyimwi lyitiri kirembo na kivaro kya-va-yo

³⁴Amwi na urungo elo, mmbo kushevaa-u na fikombe fiinani fivakkye fivaro fya mlosi, amwi na fifiringisyo na fivaro fya-vayo.

³⁵Ando maramba alya arindaru akeesomukkya nang'u mmbo kushevaa na fifiringisyo kwasi ya maramba alya arindaru.

³⁶Fifiringisyo efyo na maramba a-vayo mmbo ashevaa kindo kyimwi amwi na ando yoo kweevika taa. Nakyo kyoose mmbo kishesingwaa na saabu shisha.

³⁷Kuwuye isongosya taa tingyi mfungare, kushetivika uwe ando a-vayo naambo tikooye imikkya yefo mbee.

³⁸Kushesongosya-se wo mwaaro na saani ya vayo kwa saabu shisha.

³⁹Kusheruuya filo makumi araru na firaanu fya saabu shisangye nisha, neesongosya ando yoo kwayeekyera taa amwi na ffya fyavayo.

⁴⁰Lola kumanyi shelyi mmbo kushesongosya ndesa llya kuleloshwa kulya ifumbuu.