Read BIBILLYA Mareiyo Meele a Iruva YUUKA 26 Bible Online

YUUKA 26 - BIBILLYA Mareiyo Meele a Iruva bible

YUUKA 26

¹Naasany songosya ando ekaa kukee kwaave ka ikumi, nsoori shisha ikee shyooke, ando amwi na nruu ta fwana ya samawi na ya sambarau, na idodorye, ando amwi na, ishora isha lya mfuru.

²Waasha lwa soori yeyo luve maako ikumi na avii na ivari lya vayo maako avii, soori eto teerummbwa tive ta kyeeso kimwi-nsi.

³Soori eto isaanu mmbo tilungwaa ando amwi, yei na yei na engyi-se araanu alungwa ando amwi elyi na elyi.

⁴Neewe mmbo kushesongosya, ifiringiso lya fwana ya samawi taari imwi yoo ikeduny lya vayo, indo kutani yoo mbai ya soori yeyo.

⁵Vika mafiringisyo makumi, araanu yoo sooriny imwi na mafiringisyo makumi araanu yoo mbai ya soori eyo yoo ikulunngye, mafiringisyo yoo aiduvani.

⁶Kusongosye-u fifungo makumi araanu fya saabu neelunga soori eto na fifungo efyo, na ando yoo ekaa ashevaa amwi.

⁷Neewe songosya ipasia lya mafwaa a mburu ave yeema yoo uwe ya ando ekaa, songosya mapasia ikumi na lyimwi.

⁸Waasha lwa wo ipasia ni maako makumi araru, na ivari lya wo ipasia ni maako aana, mapasia yoo ikumi na lyimwi mmbo asheva a kyeeso kimwi.

⁹Naasany kulunge mapasia araanu kyaanya, na mapasia arindaru kyaanya na ipasia lyilya lya karindaru kulyivike yoo mbee ya ando yoo.

¹⁰Vika mafiringisyo makumi araanu yoo kufurumyi taari ya ipasia elyo lyifurumyi kwa yoo malunge, na mafiringisyo yoo kufurumyi kwa ipasia elyo lyikee kipoo ya yoo a kavii akee malunge ando amwi.

¹¹Lyingyi songosya fifungo makumi araanu fya arera, kufivike efo mafiringisyony alya neelunga yeema ando amwi, naambo lyive lyimwi.

¹²Na kyenga kilya kya kyasaa-u, ekyo kyilunngye mapasia a yeema kyenga kilya kya ipasia kyasaa, kyinunuke taari ya numa ya ando yoo ekaa.

¹³Na waasha elo lwa woko lumwi taari imwi na woko lumwi taari yeyo ingyi, ya waasha lwa mapasia yeyo ilesaa, mmbo tishewoyaa yoo mbai ya ando yoo, taari yei na taari yei na taari yei naambo iisikkye.

¹⁴Neewe songosya kifiniko kya yeema elyo, kya masara a suva akee maambe fwana idodorye, na yoo uwe ya vayo kifiniko kya masara mesha.

¹⁵Neewe songosya maboo a ando yoo eele a nri wa mshita asaleeswa,

¹⁶Wo iboo mmbo lyishevaa waasha lwa maako ikumi, na ivari lya iboo lyive woko lumwi na kyenga.

¹⁷Wo iboo lyitire ngyulumi ivii, tikee shilunge ando amwi, niindo maboo moose a ando yoo ashevaa.

¹⁸Kusongosye maboo a ando yoo, maboo makumi avii avikwa taari ya sinde alle-fo.

¹⁹Neewe songosya firembo makumi aana a fesa kwasi ya maboo alya makumi avii, firembo fivii kwasi ya iboo lyimwi, fiwarye ngyulumi tilya ivii, na firembo figyi fivii si ya iboo lyingyi fiwarye ngyulumi ivii.

²⁰Na taari ya kavii ya ando yoo, taaari ya ndoo maboo makumi avii,

²¹na firembo fya vayo fya fesa makumi aana, firembo fivii kwasi ya iboo lyimwi, na firembo fivii-se kwasi ya iboo lyingyi.

²²Lyingyi kusongosye maboo arindaru kimaruma kya taari ya numa ya ando yoo taari ya nkwaany.

²³Lyingyi songosya maboo avii kuvike mbai efo numa.

²⁴Efo kwasi ni ivii ivii, nato mmbo tilungwaa ando amwi eto tivakyani, tifike uwe yoo kiringityeny kya vayo, toose ivii niindo tishevaa, kimaruma kya mbembe eto ta vayo.

²⁵Maboo mmbo ashevaa nyanya, na firembo fya fesa, firembo ikumi na firindaru, firembo fivii kwasi ya iboo lyimwi, na firembo fivii kwasi ya iboo lyingyi.

²⁶Neewe songosya fyeeko fya mshita, fyeeko firaanu kwa maboo a taari imwi ya ando yoo,

²⁷na fyeeko firaanu kwa taari yeyo ya kavii ya ando yoo na fyeeko firaanu kwa taari yeyo ya numa taari ya nkwaany.

²⁸Na kifyeeko ekyo kikee nnangani a maboo yo lyilollywa taari yei na yeyo ingyi.

²⁹Na maboo yoo ashesikyoo ni saabu na pete ta vayo teevika fyeeko filya kufisongosye ta saabu na fyeeko efyo kufyaambike na saabu.

³⁰Na ando yoo ekaa kusheasaleesa shaasa kuleorwa kulya ifumbu-u.

³¹Numa kusongosye ipasia lyesikkya lya ruu ta fwana ya samawi na fwana ya sambarau na fwana idodorye ya kitambaa kisha kikee kyooke, lyifumwa neevikwa lyive ishora lya mfuru nsha,

³²naasa kulyivanike ngony iinya ta nri wa mshita tikeeshisikkye kwa saabu, fifingyo fya vayo five fya saabu na firembo fya fesa fiina.

³³Neewe vanika ipasia elyo efo kwasi ya fifungo filya, neewe kweendeny isanduku elyo lya mavavaso kulyivike efo numa ya ipasia elyo lyaave yoo nnang'ani a ando yoo kweele na yoo kweele mmwasi.

³⁴Neewe vika kitima ekyo kyesarya yoo uwe ya isanduku elyo lya mma, ando yoo kweele nnu deny.

³⁵Na mesa ilyayo kuivike kipoo ya ipasia elyo na kiri ekyo kya yeekyera taa kufii na mesa taari ya sinde, yo mesa ikee taari ya kwa ndoo.

³⁶Lyingyi kusongosye kindo kyesiika mwaango wa yeema, kusongosye na ruu ta fwana ya samawi, na sambarau na fwana idodorye, ta ruu shisha shooke neevikwa utore.

³⁷Neewe songosya ngo isaanu ta nri wa mshita kwa kindo ekyo kyesiika mwaango kutisikye na saabu; na kulabu ta vayo tive ta saabu, kureiye na firembo fya vayo firaanu fya minya ya arera kimaruma kya vayo.