Read BIBILLYA Mareiyo Meele a Iruva YUUKA 27 Bible Online

YUUKA 27 - BIBILLYA Mareiyo Meele a Iruva bible

YUUKA 27

¹Neewe songosya kitara kyerasya kya nri wa mshita, waasha lwa vayo maako araanu, na ivari lya vayo maako araanu, kitara ekyo koose kwiinani, na yeenda uwe maako araru.

²Neewe vika ndumba iinya efo ndumbeny iinya, nato, ndumba eto mmbo tivaa ta ngata imwi na kitara ekyo kyerasya, kukisikkye na minya ya arera.

³Na fiiya fya vayo fya yuuta ifu kufisongosie, na makumbi a vayo na bakuri ta vayo, na fidau na mariko a vayo, fiiya fya vayo fyoose five fya minya ya arera.

⁴Na kitara ekyo kyerasya kukisongosye shekesheke ya minya ya arera, naasa kuvike bangilyi iinya efo ndumbeny iinya ta shekesheke yeyo.

⁵Neewe vika shekesheke yeyo efo kwasi ya kitara ekyo kyerasya naambo shekesheke yeyo ikooye yoo nnang'ani a kitara ekyo.

⁶Neewe songosya miri kimaruma kya kitara ekyo, miri ya mshita, kufyaambike minya ya arera.

⁷Miri yeyo ivikwa nrashi, na miri yeyo ivikwa taari ivii ta kitara ekyo kyerasya, kyeeri kya iipoo.

⁸Misongosye ya maboo, itiri mwaanya efo si, shaasa kuleorwa alya ifumbuu, niindo kushetanaa.

⁹Neewe songosya kari ka ando yoo ekaa, taari ya kulella sinde kukee-u soori shuumu yeefumwa, waasha lwa vayo maako iyana

¹⁰na ngo ta vayo tive ngo makumi avii na firembo fya vayo makumi avii, firembo fya vayo five fya minya ya arera, kulabu ta vayo na fifungo fya vayo five fya fesa.

¹¹Na taari ya ndoo ni indo-da, waasha lwa soori yeyo shuumu luve maako iyana na ngo ta vayo makumi avii, firembo fya vayo makumi avii five fya minya ya arera, kulabu ta ngo eto na firingisyo fya vayo five fya fesa.

¹²Na taari ya nkwaany, ivari lya kari, kuve-fo soori yeyo shuumu ya maako makumi araanu ngo ta vayo ikumi na firembo fya vayo ikumi.

¹³Taari ya ngama, kulya kundo mwaango ukai mmbo ngiri ishevaa na ivari lya mita makumi avii na ivii.

¹⁴Soori eyo taari imwi ya mwaango ive maako ikumi na araanu ivari lya vayo na ngo ta vayo ni isaru na firembo fya vayo firaru,

¹⁵Taari ya kavii ni indo-da, soori ya maako ikumi na araanu, ngo ta vayo isaru na firembo fya vayo firaru.

¹⁶Na yoo mwaangony wa kari kukee-u kindo kyeeisikkya kya waasha maako makumi avii, ekyo kyeesikkya kive kindo kya fwana ya samawi na ya sambarau, na idodorye, ive soori shisha ikee shookye, ikee shivike utore ngo ta vayo tive iinya na firembo fya vayo fiina.

¹⁷Ngo toose eto tiringitye kari eko taari toose mmbo tishefiringisywa fesa, kulabu ta vayo ta fesa, na firembo fya vayo fya minya ya arera.

¹⁸Waasha lwa kari eko luve maako iyana na ivari lya vayo maako makumi araanu koose na yeenda uwe maako araanu five fya ngo ta soori shisha, na firembo fya vayo five fya minya ya arera.

¹⁹Fiiya fyoose fya ando yoo (ekaa) efyo fya urundi lwa vayo loose, na mbambo ta vayo toose, na mbambo eto ta kari eko koose tive ta minya ya arera.

²⁰Neewe vavasya vana va Israeli vakweengye mafura a seituni akee mesha, akee makami, kwa kimaruma kya sa naambo taa yeyo yaake ilarumike.

²¹Efo yeemeny elyo lyekaa kiboo ya ipasia, yelyo lyikee mbee ya ukureeki elo, Aron na vana vakwe mmbo vasheisongosyaa uka nkwaany fika ngama mbee ya Nndumi Iruva; ni ivavaso lya llung'anu marika awo moose kimaruma kya vana va Israeli.