Read BIBILLYA Mareiyo Meele a Iruva YUUKA 31 Bible Online

YUUKA 31 - BIBILLYA Mareiyo Meele a Iruva bible

YUUKA 31

¹Nndumi Iruva karera na Mose kammbia,

²“Lola, mmbo shilefishya Besaleli mwana wa Uri irina, mmbwe mwana wa Huri wa ufyari lwa Yuda;

³shamwishura mumuyo wa Iruva, wa urango na usha, mwitana sahabu na fesa na minya ya arera,

⁴shamwishura wiidimi lwesongosya findo fya wo ngata.

⁵Neerummbwa mawe a uuru eshopa kundo neereiya firi, na mashora a waarya, lwa wo ngata.”

⁶Na lyingyi lola, mmbo shilensauwa nakae neewe Oholiabu eto, mwana wa Ahisamaki, wa ufyari lwa Dani, neeny shavika urango efo miriminy ya yewo woose vatiri urango, naambo vatani fyoose shilekuvavasya;

⁷llyo yeema yelyo lyekwanannya, na isanduku lya ukureeki, na kitima kya isaryo ekyo kikee uwe ya vayo na fiiya fyoose fya yeema,

⁸na mesa na fiiya fya vayo na nri wetira taa na fiiya fya vayo fyoose, na kitara kyefumbirya nrungo,

⁹na kitara kyekorya firaso na fiiya fya vayo fyoose na birika na kirembo kya vayo,

¹⁰na soori shifumi kwa waarya nnu na soori sheele ta Aron we Nkuhani, na soori ta vana vakwe naambo varunde ishora lya ukohani,

¹¹na mafura a yaamba, na ubani lutiri nrungo nsha, a ando yoo eele, shaasa shilekuvavasya nawo niindo vashetanaa.

¹²Nndumi Iruva karera na Mose kammbia,

¹³“Naasa, rera yewe na vana va Israeli kuvavie, ‘Nkuti musheinndya sabato takwa mashika llo wende yoo nnang'ani yakwa neeni na marika any moose, naambo mumanye yeny ni Nndumi Iruva mwivailyisa yeni.’”

¹⁴Naasa mmbo mushetiraa sabato; mashika nsheele kwany, wo nndu yeto asheitefusa, nkyadede nkuti nawaawa, mashika wo nndu asherundaa mashora nkonu yeto, nndu yeto mmbo asheumbutywa kwaasha na vandu vakwe.

¹⁵Mashora narundo ando a mikonu irindaru kyeendi nkonu wa mfungare ni sabato ya iimuya deny, ikee sheele kwa Nndumi Iruva, we nndu yeto asherundaa mashora nkonu wa sabato, nkya dede nkuti nawaawa.

¹⁶Kimmba niindo, nkuti vana va Israeli vatire sabato, iringa sabato yeyo deny na marika awo moose, ni kyaasa kya llung'anu.

¹⁷Ni wende nnang'ani yakwa yeny na vana va Israeli llung'anu, mashika Nndumi Iruva ando a mikonu irindaru aleumba iruveeu na ulana, na nkonu wa mfungare kaimuya.

¹⁸Kyeeri Nndumi Iruva alemaa irera na Mose alya ifumbuny lya Sinai, kaninngya maboo yoo avii a ukureeki, maboo avii a mawe, tikeeshireiye ni Iruva.