Read BIBILLYA Mareiyo Meele a Iruva YUUKA 36 Bible Online

YUUKA 36 - BIBILLYA Mareiyo Meele a Iruva bible

YUUKA 36

¹Naasany Besaleli na Oholiabu mmbo varundaa mashora, na wo nndu atiri nrima wa waarya, yeto Nndumi Iruva ansimmbye urango na waarya, wo nndu yeto nrima wakwe ulemwitika nanderunda ishora elyo,

²Mose kavaanga Beisaleli na Oholiabu na vandu vengyi, valya vakeevasimbe, widimi lwa ufuru, luuka kwa Nndumi Iruva, vapooke irunda mashora kyuuka nriminy mbwakwe kuleefo wiitiki.

³Nawo vakawarya firaso efyo fyuuka maakony a Mose, yefyo vana va Israeli valeuta, kimaruma kya urundi lwa ando yoo eele, naambo fisongosieny. Naasa vakamweengye firaso wo nkonu ngama, vetiri nrima wa ilanga.

⁴Na vandu yewo woose vetiri waarya, yewo valerunda ishora lya ando yoo eele, vakara-u mbele wo nndu ishora lyakwe elyo ekeerunda.

⁵Vakanderera na Mose, vakammbia, “Vandu mmbo vakeende fido fiingyi ngota efyo fikundywa fya ishora elyo, Nndumi Iruva alevavasya lyirundwa.”

⁶Naasa Mose kavavasya, weele lukakapa kulya ulaleny koose vakaamba, “Valakirunde-fo, nta womi nta vaka-fo kimaruma kya fimu fya ando yoo eele-fo, Naasa vandu vairikiso, valakyeende-se-fo.

⁷Mashika findo efyo vetiri mmbo filemaa irunda ishora elyo lyoose, na ilannya.”

⁸Naasany, wo nndu atiri nrima wa warya nnang'ani ya vandu yewo valerunda ishora, kasongosia ando yoo na soori ikumi ya soori shisha tikee shooke, ta nruu ta fwana ya buluu, na ta fwana ya sambarau, na tidodorye, ando amwi na, ishora lya waarya ni indo lyilerundwa.

⁹Waasha lo soori yeyo yeerumbwa lukava marambo makumi avii na nyanya na ivari lya vayo maako aana, na soori eto toose tikava ta kyeeso kimwi.

¹⁰Nawe kalunga soori eto isaanu yei na yei, na tingi isaanu yei na yei.

¹¹Numa kavika ufumu lwa ruu ta fwana ya buluu efo mbai ya soori imwi, kavetana lyingi indo efo ikeduny lya soori yekee taari ya kyipoo ya ilungo lya kavii.

¹²Kavika ngyufumu makumi araanu sooriny imwi na ngyufumu makumi araanu efo ikeduny lya soori ingyi (ya kavii) ngyufumu eto tikakulela yelu na yelu.

¹³Numa kavika fifungo makumi araanu fya saabu, numa kalunga soori eto yei na yei na fifungo filya na ando yoo akava amwi nsi.

¹⁴Numa kasongosia fifuniko fya mafwaaa a mburu fya isikya ando yoo, kavika na soori teesikya ikumi na imwi.

¹⁵Waasha lwa woo soori (isullya) ni marambo makumi araru na ivari lya vayo marambo aana na masullya moose yoo ekee a kyeeso kimwi.

¹⁶Nawe kalunga masullya araanu kyaanya na masullya arindaru kyaanya.

¹⁷Kandosha fifingo makumi araanu efo ikeduny lya isullya lyikee taari ya poo yoo ilungyou, kadosha fifingo makumi araanu efo mbai ya isullya elyo ikee taaari ya boo, yoo ilungyony lya kavii.

¹⁸Numa kasongosia fifingo makumi araanu fya minya ya arera nalunge yeema elyo ando amwi naambo lyive lyimwi.

¹⁹Numa kavika kifiniko kya yeema elyo lya masara a suva akee maambe fwana idodorye, na numa ya vayo kifiniko kya isara imamiri.

²⁰Numa kasongosia maboo a mshita kwa ando yoo eele, akasaleeswa.

²¹Waasha lwa vayo ni marambo ikumi, na ivari lya vayo irambo lyimwi na kyenga.

²²Wo iboo lyikatira ngyulumi ivii, tikee shilunge ando amwi, niindo maboo moose a ando yoo ekai.

²³Nawe kasongosia maboo yoo kimaruma kya ando yoo maboo makumi avii kwa taari ya sinde tille sinde,

²⁴nawe kasongosia firembo fya fesa makumi aana five kwasi ya maboo yoo makumi avii, firembo fivii kwasi ya iboo lyimwi kwa ngyulumi yeto tavayo ivii, na firembo fivii kwasi ya iboo lyingyi na ngyulumi tavayo ivii.

²⁵Na kwa taari ya kavii nnyo ya ndoo, kavika maboo makumi avii.

²⁶Na firembo fya vayo makumi aana fya fessa, firembo fivii kwasi ya iboo lyimwi na firembo fivii kwasi ya iboo lyingyi.

²⁷Neefo taari ya numa ya ando yoo taari ya nkwaany kavika-u maboo arindaru.

²⁸Nawe kavika maboo avii kwa ndumba ta ando yoo efo numa.

²⁹Nang'u mmbo ekee maboo akuvakye efo kwasi; nkyo tikasalala ando amwi fika uwe tikakooya kiringitya kya mbee niindo alesongosya toose tivii.

³⁰Nkyo mmbo eekee maboo nyanya, na firembo fya vayo fya fesa, firembo ikumi na firindaru firembo fivii kwasi ya wo iboo.

³¹Numa kavika mbindi ta nri wa mshita isaanu kwa maboo a taari imwi ya ando yoo yeele,

³²na mbindi isaanu kwa maboo a taari ingyi ya ando yoo, na mbindi isaanu kwa maboo a ando yoo tikekaa numa taari ya nkwaany.

³³Nawe kareiya mbindi yeyo imwi lyisomukye yoo nnang'ani yaa maboo taari yei fika taari yei.

³⁴Na maboo yoo kasikya na sahabu, na pete tilya ta sahabu kativika ando a mbindi eto kasikya mbindi yeto na saabu.

³⁵Numa kasongosia isullya elyo lya n'ruu ta fwana ya buluu na ta sambarau na tidodorye na soori shisha ikee shooke kavika na, ishora lya waarya, niindo aletana.

³⁶Nawe kasongosia kimaruma kya vayo ngo iinya ta nri wa mshita, kataambika na sahabu na kulabu ta vayo tekee sahabu, nato kativikya firembo fya vayo fiina fya fesa.

³⁷Kookafo kasongosia isullya isha kimaruma kya mawe ando kwa yeema yeele, na soori ya vayo ni ya fwana ya buluu na sambarau na idodorye, soori shisha ikee shooke, ishora isha lya mwilongalonga

³⁸na ngo ta vayo isaanu ando amwi na kulabu ta vayo, nawe kataambika saabu mirwe ya vayo na fifingo fya vayo, na firembo efyo fya vayo firaanu fikava fya minya ya arera.