Read BIBILLYA Mareiyo Meele a Iruva YUUKA 37 Bible Online

YUUKA 37 - BIBILLYA Mareiyo Meele a Iruva bible

YUUKA 37

¹Naasa Bezaleli kasongosia isanduku lyilya lya nri wa mshita, waasha lwa vayo lwekee sentimita iyana na ikumi na ivari lya vayo sentimita makumi arindaru na irindaru;

²kalyaambika sahabu shisha, kiboo na kimmba, kavika na kiringitya kya vayo kya sahabu taari toose.

³Nawe kavika pete yiinya ta sahabu kimaruma kya vayo, efo marendeny a vayo aana, ivii taari imwi na ivii taari yeyo ingyi.

⁴Kasongosia na firi fyelyiibo na nri wa mshita kayambika sahabu.

⁵Kavika firi efyo kulya pete tilya teekee efo mbai ya isanduku tive ta ilyiiboo.

⁶Numa kasongosia kitima kyesarywa kya sahabu shisha, waasha lwa vayo sentimita iyana na ikumi na ivari lya vayo sentimita makumi arindaru na irindaru.

⁷Numa kasongosya avii a sahabu, akee masongosye ni mfuru, akee yoo mbai ya kitima ekyo kyesarya;

⁸Kerubi umwi taari yei na ungyi taari yeyo ingyi, mmbo alesongosya yoo avii a kindo kya ngata imwi na mbai yeyo ya kiri ekyo kyesarya.

⁹Na yoo akaorwa maaru awo uwe, na kya kitima ekyo kasarya na maaru a vayo, na fisangu fya vayo fikakulola, yeu na yeu, na fisangu fya vayo mmbo fyelollye yoo kitimeny kya isarywa.

¹⁰Naasa kavika mesa yeyo ya nri wa mshita, waasha la vayo sentimita makumi nyanya na nyanya na ivari lya vayo ni sentimita makumi aana na yiinya, na yeenda uwe ni sentimita makumi arindaru na irindaru.

¹¹Nawe kayaambika sahabu shisha, efo mbai kairingitya na sahabu taari toose.

¹²Numa kavika wungo ubashe lweiringitya lutiri irambo lyimwi iviri; na iringitya urango elo na sahabu.

¹³Nawe kavika-fo rashi iinya ta sahabu efo taari eto iinya ta marende a vayo aana.

¹⁴Tikava kufii na urungo elo upashe naambo ave ando a iipoiyo mesa yeyo.

¹⁵Nawo kasongosia firi efyo fya yiipoiyo mesa nayo-da ni nri wa mshita, kaishopa na sahabu ya yiiboo mesa yeyo.

¹⁶Na fiiya efyo fikee uwe ya mesa yeyo, saani ta vayo, na miriko ya vayo, na bakuri, ta vayo, na makobo a vayo a ilettya, fyoose kafisongosya na saabu shisha.

¹⁷Numa kavika kiri kilya kyeetira taa kive kya sahabu shisha, kakisongosya kya ishora lya mfuru, kirembo kya vayo, na kiri kya vayo, fikombe fya vayo, na matofaa a vayo na, fivaro fya vayo, fyoose fikava fya ngata imwi.

¹⁸Nakyo kikatira maramba arindaru ookyo kwa vayo, na maramba araru akauka taari yei na araru taari yeyo ingyi;

¹⁹fikombe firaru fikee fisongosie fikavaka fivaro fya mlozi, kivaro kya vayo na fikombe firaru fivakye fiwaro fya mlozi neefo irambeny lya kavii, kivaro lya kavii, naaindo-da na maramba alya arindaru akee yoo kiriny ekyo kya taa.

²⁰Yoo kiriny ekyo kya taa kukaau fikombe fiina fikee fisongosie sha fivaro fya mlozi, fitiringo fya vayo na fivaro fya vayo;

²¹na yoo kwasi ya maramba kukaa kitiringo kikee kindo kimwi nafyo, na kwasi ya maramba engyi avii, kukakaa-u kitiringo kyimwi na kikee kindo kimwi nafyo na kwasi ya maramba yoo avii kweiyo-se kitiringo kimwi akee kindo kimwi nang'u, kimaruma kya maramba arindaru aukye kwa vayo.

²²Fitiringo efyo na maramba a vayo akava a kindo kimwi; nri yeto moose wa taa ni ishora lya mfuru, ngata imwi ya sahabu shisha.

²³Numa kavika taa ta vayo mfungare na mwaaro wa vayo na saani ta vayo, fya sahabu shisha.

²⁴Shasho yeefurukannya ishora elyo ikafikya kilo makumi araru na firaanu ta saabu.

²⁵Numa kasongosia kitara ekyo kyefumbirya nrungo, kya nri wa mshita waasha sentimita makumi aana na isaanu, na yeenda uwe sentimita makumi kyeenda na ndumba ta vayo tikava ta ngata ya vayo.

²⁶Kaishopa na saabu, shisha, uwe neefo mbai koose, na ndumba eto ta vayo neefo mbai kairingitya na saabu koose.

²⁷Nawe kaisongosia rashi ivii ta sahabu kativika efo mbai ya vayo, mbai taari ivii, ave ando a firi efyo fya iyiipoo.

²⁸Kasongosia firi efyo fya nri wa mshita, na ifishopa saabu shisha.

²⁹Kasongosya mafura myeele, ekwaamba na ubani usha lutiri nrungo nsha, lukee nsasande kisha sha mafura afwaamaa.