Read BIBILLYA Mareiyo Meele a Iruva YUUKA 38 Bible Online

YUUKA 38 - BIBILLYA Mareiyo Meele a Iruva bible

YUUKA 38

¹Ekimaa kasongosia kitara ekyo kyekorya firaso, kya nri wa mshita, waasha fiinani sentimita mayana avii na makumi avii na isaanu; nayeenda uwe sentimita iyana na makumi avii na isaanu.

²Nawe kasongosia ndumba ta vayo yiinya na ndumba ta vayo yiinya na ndumba yeto n'ta ngata imwi, katishopa na minya ya arera.

³Numa kasongosia fiiya fyoose, fya kitara ekyo, mfyo sufuria ta vayo, makumbi a vayo na bakuri ta vayo na uma ta vayo; na mariko a vayo, na fiiya fya vayo fya minya ya arera.

⁴Nawe kavikya kitara ekyo shekesheke ya minya ya arera kaivika kwasi ikaringitya taari toose, ikava yoo nnang'ani ya kitara ekyo.

⁵Kavesongosia fipulyi fiina fyeevika efo ndumbeny iinya ta shekesheke yeyo na ave ando a ivika firi fya iipoo.

⁶Firi efyo fikava fya mshita nawe kafishopa na minya ya arera.

⁷Nawe kavika firi efyo efo fipulyiny filya fikee efo mbai ya kitara ekyo, naambo kive iboo kaaisongosia kuvefo mwaanya efo kwasi kweevika maboo yoo.

⁸Naasa kasongosia birika yeyo ya arera na kirembo kya vayo kya arera, arera yeyo yekee ya vaka fishinga, yewo verundyaa yoo yeemeny yeele.

⁹Nawe kasongosia kari eko, taari ya sinde ille sinde, isullya lya kari lyikava lya soori shisha shooke, na maako, ngo ta vayo makumi avii na firembo fya vayo makumi avii ni fya arera, kulabu ta ngo na fifingo fya vayo ni fya fesa.

¹⁰Nato tikasiikwa ni ngo makumi avii ta arera, na nsuka wa vayo firembo makumi avii fya arera.

¹¹Taari ya ndoo, waasha lwa ishandarwa mmbo lweeke mita makumi aana na yiinya, na ngo-ta-vayo makumi avii ta arera. Indi fyaasi na misirya, ya-va-yo mmbo fyeeke fya fesa.

¹²Taari ya nkwaany kukakaau isullya lya maako makumi araanu waasha, soori ta vayo ni ikumi na firembo ikumi; kulaleu na soori eto na fifingo fya vayo ni fya fesa.

¹³Taari ya ngama kulla ngameny maako makumi araanu.

¹⁴Isullya lya taari imwi ya mwaango lyekee maako ikumi na araanu waasha lwa vayo na ngo ta vayo isaaru na firembo fya vayo firaaru,

¹⁵indo na taari ya kavii, taari yei na yei ya mwaangony wa kari kwiyo soori ya waasha lwa mita irindaru na kyenga ngo ta vayo ni isaru na firembo fya vayo firaru.

¹⁶Maasullya na soori ta kari tiringitye taari toose tekee ta soori shisha ikeeshooke.

¹⁷Na firembo fya soori eto fyekee fya arera, na kulabu ta soori eto na fifungo fya vayo ni fya fesa, na mirwe ya ngo eto ni ya fesa, na ngo toose ta kari eko tikava ta fesa.

¹⁸Na isullya elyo lya mwaango wa kari, lyekee ni ishora lya mwishopa, lyekee lya nruu ta fwana ya buluu na fwana ya sambarau idodorye, na soori shisha ikeeshooke, lyitiri mita kyeenda waasha na ivari lya mita ivii yeenda uwe, na isennya lya vayo ikava na ivari lya maako araanu, naambo lyiinane na isullya llya lya kari.

¹⁹Soori ta vayo tekee iinya, na firembo fya vayo fiina, nafyo ni fya arera; kulabu ni ta fesa na mirwe ya vayo ni ya fesa.

²⁰Na fireiya fyoose fya yeema na fya kari karingitya taaari toose fyekee fya arera.

²¹Fiiya fyoose efyo filesongosyo kimaruma kya yeema elyo, ando yoo a ukureeki, mfyo efi, shaasa fileekenwa, shaasa Mose alevavasya, kya urundi lwa valevi kwa woko lwa Ithamari, we mwana wa Aron akee Nkohani.

²²Na Besaleli mwana wa Uri mwana wa Huri, wa ufyari lo Yuda, Katana fyoose shaasa Nndumi Iruva alevavasya Mose.

²³Nawe mmbo eriani na Oholiabu, we mwana wa Ahisamaki, wa ufyari lwa Dani, ulya ekee mwaarya wa ishopa na ireiya, nndu ekee mwaarya, nawe ekee mwaarya wa ishopa na n'ruu ta bluu na ta fwana ya sambarau na idodorye ya soori shisha.

²⁴Saabu shoose ilarunndya ishora elyo ishora elyo lyoose lya ando yoo eele saabu eyo ya firaso, yeekee talanta makumi avii na kyenda, na shekeli mayana mfungare na makumi araru, kwa kyeeso kya shekeli ya ando yoo eele.

²⁵Na fesa ta yewo valeteekena, vandu va ironda elyo, ekee talanta iyana, na shekeli kyiku mayana mfungare makumi mfungare na isaanu kiinani na shekeli ya ando yoo eele;

²⁶kyenga kya shekeli; kiinani na shekeli ya ando eele shaasa wo nndu aleekennywa, eetiri myaaka makumi avii, ao mwasi, kimaruma kya womi fiku mayana arindaru na firaru mayana araru na makumi araanu.

²⁷Na talanta eto iyana ta fesa tekee teesongosia firembo fya ando eele na kirembo kya isullya elyo, firembo iyana kwa talanta eto iyana, talanta imwi kwa kirembo kimwi.

²⁸Na kwa shekeli eto kyiku mayana mfungare makumi mfungare na isaanu kavika fifungo fya ngo eto, na ishopa mirwe yeyo ileendwa yekee talanta makumi mfumgare na shekeli fiku fivii na mayana aana.

²⁹Efyo fyoose fyesangirywa mmbana va Israeli, kya mashora a Iruva, mmbo fyeefikye kilo kyiku kyimwi, mayana avii, makumi avii na fiina.

³⁰Nawe kasongosya firembo fya arera lya mwaango wa yeema yelo yeele, na kitara ekyo kyerasya kya arera, na shekesheke yeyo ya arera, na fiiya fyoose fya kitara ekyo,

³¹na firembo fya kari iringitya taari toose, na firembo fya mwaango wa kari eko, na mbambo (vigingi) fyoose fya yeema, na mbambo shoose fyoose fya kari eko karingityeu taari toose.