Read BIBILLYA Mareiyo Meele a Iruva YUUKA 39 Bible Online

YUUKA 39 - BIBILLYA Mareiyo Meele a Iruva bible

YUUKA 39

¹Na n'ruu tilya ta fwana ya buluu na sambarau na tidodorye, vakaoka soori tikee shisongosye kwa waarya nnu ta irundya ando eele, na isongosya masara yoo a Aron, indo shaasa Nndumi Iruva alevavasya Mose.

²Nawe kasongosia naivera, ya n'ruu ta saabu, na ta fwana ya buluu na ta sambarau na tidodorye soori shisha yeyookwa.

³Nawo vakasongosya sahabu yeyo kutani yava sha nkova mwaasha, numa vakairumbwa ive sha nruu, naambo veedimi iifuma ando amwi na n'ruu eto ta fwana ya buluu na sambarau na tidodorye, na soori yeyo shisha, ishora lya waarya nnu.

⁴Nawo vakasongosya na soori yeenunuta maveny kimaruma kyakwe fikee filunge amwi efo mmba.

⁵Na nkanda eto wa ishora lya waarya, ukee uwe ya vayo naambo uufingye ando a vayo, wekee wa kindo kimwi na ngata imwi na naivera yeyo, ya saabu, na fwana ya buluu na fwana ya sambarau na fwana idodorye, na soori shisha ya yooka, indo shaasa Nndumi Iruva alevavasya Mose.

⁶Nawo vakasongosya mafura yoo afwaamaa akee mavike fiiyeny fya saabu fikee fireiye kiringitya kulelatya marina a vana va Israeli.

⁷Nawe kafivika yoo sooriny ya meeveny fya naivera, naambo five utore lweekumbwa kya vana va Israeli, shaasa Nndumi Iruva alevavasya Mose.

⁸Nawe kasongosya mboloko ilya ya mbafuny, ishora lya waarya, sha ishora elyo lya naivera, ya n'ruu ta sahabu, na ta fwana ya buluu, nato sambarau na tidodorye, na soori shisha shyooke.

⁹Kyeenani koose, vakasongosya mboloko ilya ya mbafuny kwa ikilema, waasha lwa vayo irambo lyimwi na ivari irambo lyimwi, nakyo kyekee kya ilemwa.

¹⁰Nawo vakavika ngamba iinya ta mafura afwaamaa, imwi yekee akiki, na yakuti ya fwana ya ikundu, na baharamani, efyo fyekee ngamba imwi.

¹¹Na ngamba ya kavii yekee sumaridi, na yakuti ya buluu, na alumasi.

¹²Na ngamba ya kararu yekee hiakinto na akiki idodorye na amatisto.

¹³Na ngumba ya kaana yekee sabarajadi, na shahamu na yaspi, mafura yoo mmbo ekee fiiyeny fya sahabu, wo kimwi ando a vayo.

¹⁴Na mafura yoo mmbo ariani na marina a vana va Israeli, ikumi na avii sha marina awo, sha muuri wa ireiya, wo imwi na irina lya vayo, sha ngyufyari eto ikumi na ivii.

¹⁵Nawo vakauvika efo kikushuny ekyo kya mbafuny mise ivakye kiwoye, ya ishora llya yoose lya sahabu shisha.

¹⁶Nawo vakasongosya fiiya fya sahabu na n'rashi ivii ta sahabu nawo vakativika efo kikushuny ekyo.

¹⁷Nawo vakavika mise yeyo ya yoosa efo n'rashiny yeto ivii eto tikee efo kikushuny ekyo.

¹⁸Neefo mbai yeeto tingi ya mise yeyo ya yoose, vakativika efo fiiyeny efyo neefivika kulya soori ta meveu teenunuta, fya naivera, taari ya mbee.

¹⁹Nawo vakasongosya n'rashi ivii vakativika yoo mbai ya mboloko eyo ya mbafuny, efo mbai, efo kambeny ya naivera.

²⁰Nawo vakaasongosya n'rashi ivii ta sahabu, na itivika kulya fyengeny filya fivii fya navera efo kwasi, taari ya mbee kufii na kifungo kya vayo, uwe ya nkanda wa naivera ukee mooke nisha.

²¹Nawo vakoomuya mboloko na nrashi ta vayo yoo naivereny na uruu lwa fwana ya buluu naambo kikae yoo uwe ya nkanda wa naivera ukeemooke waarya, naambo na mboloko eyo ya mbafuny kukulunge na naivera, indo shaasa Nndumi Iruva alevavasya Mose.

²²Nawe kasongosya ikoti elyo lya naivera lya ishora lya yooka, fwana buluu lyoose;

²³na singo yeyo yekee yoo nnang'ani, sha singo yeyo yekee yoo kansuny numa, na utore elo luringitye singo yeyo naambo ilaranduke.

²⁴Nawo vakavika efo ikeduny lya ikoti nruu ta fwana ya buluu na sambarau na fwana idodorye na soori ikee shyooke.

²⁵Nawo vakasongosya njolo shisha ta saabu nawo vakavikaa njolo eto.

²⁶Fishengele na findo efyo fyeekee fifummyi efo sooriny yakwe filelengetya ikendu lya soori yakwe mmbo kyetannyika ndesa Nndumi Iruva evavasya Mose.

²⁷Nawo vakasongosya kansu eto ta soori shisha yeefumwa, ya Aron na ta vana vakwe,

²⁸na kikofia ekyo kya soori shisha, na kofia tilya ta soori shisha ikee shooke,

²⁹na nkanda eto wa soori shisha ikeeshooke na fwana ya buluu na ya sambarau na idodorye, ishora lya waarya lya mwilonga longa, indo shaasa Nndumi Iruva alevavasya Mose.

³⁰Vakasongosya ibala elyo lya ureto weele lwa saabu shisha, neereiya uwe ya vayo, shaasa muuri ureiyaa “Mweele kwa Nndumi”.

³¹Nawo vakavika uruu lwa fwana ya buluu naambo lufinngye yoo kofieny yeyo taari ya uwe, indo-da shaasa Nndumi Iruva alevavasya Mose.

³²Naasa niindo ishora lya ideesya ando a yeema yeele ilemarisyo, na vana va Israeli mmbo valetana shaasa Nndumi Iruva alevavasya Mose, nawo niindo valetana.

³³Naasa vakeengye Mose yeema elyo, nkyo ni yeema, na fiiya fya vayo fyoose, fifungo, maboo, mbindi, ngo ta vayo, na firembo fya vayo,

³⁴na kifiniko kya vayo kya isara lya suva tikee shishope na fwana idodorye, na kifiniko kya isara lya iklunga, na isullya,

³⁵na isanduku lya ukureeki, na firi fya vayo, na kitima kyesaryo,

³⁶na mesa, na fiiya fya vayo, na mikate ya myoorye,

³⁷na nri wa taa, na taa ta vayo, na taa tevika ando a vayo, na fiiya fya vayo fyoose, na mafura a taa.

³⁸na kitara kya sahabu, na mafura a yaamba, na findo fya nrungo nsha na isullya lya mwango wa Yeema.

³⁹Na kitara kya arera, na shesheke ya vayo ya arera, na firi fya vayo, na fiiya fya vayo fyoose, na birika na kirembo kya vayo,

⁴⁰na isullya lya mwango wa kari, na fiwoye fya vayo na mbambo ta vayo, na fiiya fyerundya urundi elo lwa ando yoo, llyo yeema yelyo yeele,

⁴¹na masara a mashora mesha a urundi lwa ando eele, na masara meele a Nkohani Aron, na masara a vana vakwe eerunda ishora lya ukohani.

⁴²Kiinani na shaasa Nndumi Iruva alevavasya Mose niindo valerunda mashora yoo moose a vana va Israeli.

⁴³Na Mose kalla ishora elyo, kalollya ate vameimaa, indo shaasa Nndumi Iruva alevavasya, vakaitana indo, naasa Mose kavavikya mbora.