Read BIBILLYA Mareiyo Meele a Iruva YUUKA 5 Bible Online

YUUKA 5 - BIBILLYA Mareiyo Meele a Iruva bible

YUUKA 5

¹Naasa numa Mose na Aron vakaenda vakavia Farao, “Nndumi Iruva, Iruva wa Israeli, aamba indi, ‘Niinga vandu vakwa mumu veende, naambo vandeshivikya nndumwa kulya kasa.’”

²Farao kaamba, “Nndumi Iruva ni vi? Kutani sheeta unyanga lwakwe, shininge Vaisraeli mumu vakweenngye deny. Yeny nshiishi Nndumi Iruva-fo, nta nshiniinga Israeli mumu veende-fo.”

³Vakaamba, “Iruva wa Vaebrania mmbo alekoora neese, lwakutereva luniinge mumu lweende kyaaro kya mikonu iraru efo kasa, lundeutya-fo Nndumi Iruva kiraso, we Iruva weeru, naambo nalashelukapa na ndwari shuumu ao fira.”

⁴Mangyi ya Misri kavavia, “Ewe Mose na Aron nkyiki elyi mukunndye irokosa vandu vare mashora? Endeepoony mario any.”

⁵Naasa Farao kaamba lyingyi, “Lolen-te, ulaalu vandu va uruka ni veengyi, neeni mmbo mukunndye ivaallwa vave varoko a vare yiipoo mario awo.”

⁶Kupookkya nkonu yeto Farao keema vesalallya vandu na varingyi vawo eevaviaa,

⁷“Mulakiniinge vandu mamburu eesongosia matofwari-fo, shaasa mwekeetana uka elyo; reny veende vanderuuya mamburu veni.

⁸Kyeendi yeekyena lya matofwari vekeesongosya lyive elyo yeni, mulaanguse-fo, mashika mmbo vakee varoko, nkyo kimaruma vekee irorongya vakaamba, ‘Luniinge mumu lweende lundeutya Iruva weeru kiraso.’

⁹Niingeny vandu yewo mashora maroo mmwasi, vaatarike, lyo mureny yaarannya marero a wongo.”

¹⁰Naasa veesalallya na varingyi yewo vawo vakasomuka-u, vakarera na vandu vakavavia, Farao mmbo aamba indi, “Yeny nshikimuningaa mamburu-fo,

¹¹Endeny mukanderuuya mamburu efo mwakooyaa muveni; mashika mashora any nnyasheanguswaa-fo.”

¹²Naasa vandu yewo vakara-raka vakakwaana urukeny lwa Misri koose veeruyaa mbulula ya efo mbuveny ando a mamburu.

¹³Varingyi vawo vakavaitika neevaavyia, “Inutyeny mashora any, kyeeso kyany mikonu myoose, sha kyeeri kilya mamburu eiyo.”

¹⁴Na vesalallya va vana va Israeli, yewo varingyi va Farao valevavika vavakallye, vakakapwa, vakavio, “Nkyiki elyi kulaore muleinutya ishora lyany ukwau neenu, musongosye matofwari affye sha llya mbee?”

¹⁵Naasa veesalallya va vana va Israeli vakeenda, vakaiya mbee ya Farao, vakaamba, “Nkyiki elyi kwalutannya indi yese mashinga afo?

¹⁶Mashinga afo nnyakeeningwa mamburu-fo, mmbo vakeeluvia, Songosyeny matofwari, na lyingyi, mashinga afo mmbo akeekapwa, kyeendi ukasha elo ni lwa vandu vafo kumuni.”

¹⁷Kavavia, “Mmbo mukee vapeere, vapeere deny, nkyo kimaruma mukeyaamba, ‘Luningeny mumu lundeutya Nndumi Iruva kiraso.’”

¹⁸Kyasia, ulaalu endeny mukanderunda mashora, mashika mmuningwaa mamburu-fo, na kilamaa mmmbo mushendee yeekyena llya yeni lya matofwari.

¹⁹Naasa vesalallya va Vana va Israeli vakalollya ulaalu mmbo kyammuma deny, llya valevio, mmushaangusaa yeekyena lya matofwari, any nta kinnywa-fo, yoo ng'u mashora any a mikonu myoose.

²⁰Kyeeri valeuka kwa Farao vakandekwaanannya na Mose na Aron, mashika mmbo vevavereye yoo shia.

²¹Vakavavia, “Nndumi Iruva nalole, na irummbwa kyany, mashika elyi mwalweenngye lukaraa deny mbee ya Farao, na mbee ya vandu vakwe, mukavaniinga mwaanya wa iluwaa.”

²²Mose kawuya kwa Nndumi Iruva kammbia, “Ale Nndumi Iruva nkyiki elyi kwatannya vande yeva kya ukasha indo? Nkyiki tupu elyi kuleshiruma?”

²³Mashika uka llya kuleshiruma kwa Farao, sharera nawe na irina lyafo, llyo aleengera ivatannya makasha; neewe nta kulaauwe vandu vafo nta kinnywa.