Read BIBILLYA Mareiyo Meele a Iruva YUUKA 8 Bible Online

YUUKA 8 - BIBILLYA Mareiyo Meele a Iruva bible

YUUKA 8

¹Nndumi Iruva kavia Mose, “Anga kwa Farao, kundemmbia, Nndumi Iruva mmbo aamba indi, ‘Lekeya vandu vakwa, naambo vandeshirunndya.

²Neewe kwallema ivalekeya mmbo nshekapaa uruka loose na filwa

³Na mura moose eto wa Naili usheisshwa filwa, nafyo mmbo fishesaamaa kutani fyasha efo mmba kwafo, neefo kiryeny kyafo kyelala, neefo kitareny kyafo, neefo mmba kwa varundi vafo, na kwa vandu vafo neefo rukony kwafo, neefo fiiyeny fyafo fyerevekya nswa.’”

⁴Na filwa efyo mmbo fishesaama neewe na vandu vafo na varundi vafo woose.

⁵Nndumi Iruva kavia Mose, “Via Aron naorrwe woko lwakwe na mbiiri uwe ya mira, na mifongo, na marrwa a mura, kweende filwa efo mireny myoose ya Misri, na filwa efyo fikasaama fikawala-wala Misri koose.

⁶Naasa Aron koorrwa woko lwakwe uwe ya mira myoose ya Misri, na filwa fikasaama fikawala-wala Misri koose.

⁷Vasavi nawo vakatana indo kya waanga lwawo, vakeende filwa efo Misri.”

⁸Llyo Farao alevaanga Mose na Aron kavavia, “Tereveny Nndumi Iruva naambo noote filwa efi kunu kwa-kwa na kwa vandu vakwa, llyo neeny shilekeye vandu naambo vandeutya Nndumi Iruva kiraso.”

⁹Mose kavia Farao, “Kyasia kuwonisye nnduma uwe yakwa kimaruma kya ekyi; amba ni indii kukunndye shikuterevye yewe, na varundi vafo, na vandu vafo naambo filwa efyo fimamitwa fyuuke kwafo yewe neefo mmbeny tafo, fishekaa efo mureny kweni.”

¹⁰Farao Kammbia, “Nndesi.” Mose Kaamba, “Na kive indo shaasa kwaamba, naambo kumanyi sheelyi nkwiifo ungyi avakkye Nndumi Iruva we Iruva weeru-fo.”

¹¹Filwa efyo mmbo fisheukaa efo kwafo na mmbeny kwafo, neefo kwa varundi vafo na kwa vandu vafo, fisaa efo mureny kweni,

¹²Mose na Aron vakasomuka kwa Farao, Mose keererya Nndumi Iruva kimaruma kya filwa efyo aleengye Farao.

¹³Nndumi Iruva katana shasa Mose alentereva; na filwa efyo fikafwa efo mmbeny, neefo poo, neefo mareminy.

¹⁴Vakafisanyirya mbillya mmbillya, uruka lukaraa deny.

¹⁵Kyeendi Farao ekilollya kyammba ng'waana, kaumisa lyingyi nrima wakwe, nalakiarannyi Mose na Aron kyikava indo shaasa Nndumi Iruva aleamba.

¹⁶Nndumi Iruva kavia Mose, “Via Aron, Orrwe woko lwakwe nakape-si na mbiiri yakwe, naambo kiluulyi kyaaluke sava urukeny lwa Misri koose.”

¹⁷Nawo vakatana indo; Aron kaorrwa woko lwakwe na mbiiri yakwe kakapa kiluulyi kya uruka kyikava sava kwa vandu na mafisi urukeny lwa Misri koose.

¹⁸Vaanga yewo nawo vakeesa itana shawo kya waanga lwawo, sava tikasheya vandu na mafisi.

¹⁹Naasa vaanga valya vakavia Farao, “Kindo ekyi ni finya ta Iruva lyo nrima wa Farao ukaengera iva muumu nta nalavaarannyi, kyikava indo shaasa Nndumi Iruva aleamba.”

²⁰Nndumi Iruva kavia Mose, “Kwiipoo ngama shuru kusalale mbee ya Farao mmbo kunkooyaa esomukaa neende mureny, kummbie, ‘Nndumi Iruva aamba indi, Lekeya vandu vakwa veende naambo vandeshirunndya.

²¹Ao kwanra kulavaniinga mumu, llyo mmbo nshendee nri shiingyi kwafo yewe, na kwa varundi vafo, na kwa vandu vafo, nato tishangaa mmba tafo na mmba ta Vamisri mmbo tisheisshwaa nri na efo urukeny koose.

²²Neeny mmbo nsherauwaa uruka lwa Gosheny yoo vandu vakwa vakai, naambo nri yeto tileende yefo, naambo tupu yewe kwiidimi imanya sheelyi Yeny mmbwe Nndumi Iruva yaa ulaniny.

²³Neeny mmbo nshevikaa nnyanu yoo nnang'ani ya vandu vakwa na vandu vafo; wende elo mmbo lusheshaa ndesi yeni.’”

²⁴Nndumi Iruva kainutya indo, tikasha nri shiingyi nnu; tikaanga mmba kwa Farao, na mmbeny ta vaarundi vakwe, na urukeny lwa Misri koose, na uruka lukalyamarika kimaruma kya nri eto.

²⁵Farao kavaanga Mose na Aron kavavia, “Endeny mukandeutya Iruva waany firaso kunu kweni.”

²⁶Mose kaamba, “Indo nkivaa-fo; mashika mmbo lusheshisshyaa Nndumi Iruva, Iruva weeru kiraso, kindo Vamisri vasuuye. A mmbo lushishaa kiraso kyoota uravi elo lwawo velollye indi vare valalukapa mawe?

²⁷Oode, mmbo lushendaa kyaaro kya mikonu iraru efo kasa, lundeshisshya Nndumi Iruva, Iruva weeru kiraso, shaasa asheluvavasyaa.”

²⁸Farao kaamba, “Shimuningaa muumu naambo mweende mundeshisshya Nndumi Iruva, Iruva waany kiraso efo kasa; llyo mmushendaa kwaasha nnu den-fo, kyasia shiterevyen-te.”

²⁹Mose kaamba, “Lola mmbo nkeuka yaa kwafo, neeny mmbo nsheterevaa Nndumi Iruva naambo nri yeto tiuke kwafo, kwa varundi vafo na vandu vafo, llyo ndesi yewe Farao kulasheilulemba-se-fo, kure kulalekeya vandu yewo wandeshisshya Nndumi Iruva kiraso.”

³⁰Mose kasomuka kwa Farao, katereva Nndumi Iruva.

³¹Nndumi Iruva katana shaasa Mose antereva, kauta nri yeto kwa Farao na kwa varundi vakwe na kwa vandu vakwe, nnyilesaa-fo nta nri imwi-fo.

³²Farao kaumisa nrima wakwe, nalakyikunde-se ilekeya vandu yewo veende.