Read BIBILLYA Mareiyo Meele a Iruva YUUKA 9 Bible Online

YUUKA 9 - BIBILLYA Mareiyo Meele a Iruva bible

YUUKA 9

¹Llyo Nndumi Iruva kavia Mose, “Yewe enda kwa Farao, kummbie, Nndumi Iruva, Iruva wa Vaebrania, aamba indi, ‘Niinga vandu vakwa mumu naambo vandeshivikkya mwiinndye.

²Mashika kwalema ivaniinga mumu veende,

³llyo woko lwa Nndumi Iruva lushekapaa findo fyafo fyeevikkya, na frasi na mishungu na ngamula, na ng'umbe, na moonri, mmbo kusheshaa-u ukiva uniini nnu.’

⁴Llyo Nndumi Iruva karauwa findo fya mmba fya Vaisraeli na fya Vamisri, nkishefwaa nta kindo kimwi kya vana va Israeli-fo.”

⁵Nawe Nndumi Iruva kadeesya nkonu kaamba, “Ndesi Nndumi Iruva mmbo asheinutya mbony yei urukeny.

⁶Elyi lya ndesi Nndumi Iruva kainutya ekyo eambaye, na findo fyevikkya fya Vamisri fyoose fikafwa; kyeendi findo fya vana va Israeli filafwe nta kimwi.”

⁷Farao karuma vandu vandelola, ate nkwiifo nta kimwi kya vana va Israeli kilefwa-fo. Kyeendi nrima wa Farao ukava mumu nalaniinge vandu yewo mumu wa yeenda.

⁸Nndumi Iruva kavia Mose na Aron, “Ipoony ng'unde imwi ya ifu lya rukony, na Mose nafwallwe na uwe Farao eelollye,

⁹Nang'u mmbo ashevaa kiluulyi kisiise efo sumbai Misri koose, nang'u mmbo ashefummbyaa vandu moore na mafisi moose.”

¹⁰Naasa vakaipoo ifu lya rukony vakasalala mbee ya Farao. Na Mose kaaera neefo uwe nang'u akaaluka moore oomborye kwa vandu na mafisi.

¹¹Na vaanga valya mbaleedima isalala mbee ya Mose kimaruma kya moore alya, mashika vaanga yewo na Vamisri woose mmbo valetirwa mmoore.

¹²Nndumi Iruva kaallwa nrima wa Farao muumu-da, nalakunde ivaarannya; ndesa Nndumi emmamba sheelyi magyi nnyashekunda yaarannya Mose na Aron-fo.

¹³Nndumi Iruva kavia Mose, “Kwipoo ngama shuru kundesalala mbee ya Farao, kummbie, ‘Nndumi Iruva, Iruva wa Vaebrania aamba indi, Niinga vandu vakwa mumu vaende vandeshivikkya mwiinndye.

¹⁴Mashika ulaalu llyo nsheengyee nrima wafo ngapo takwa toose, sheengye na varundi vafo woose, na vandu vafo woose, llyo yewe kushemanyaa nkwiifo nta umwi ulaniny koose ashivakkye-fo.

¹⁵Mashika mmbo sheekoyaa ulaalu shammorrwa woko lwakwa shikukape yewe na vandu vafo, shikukape na isuku, neewe mmbo kweshaangatwaa deny kuuke yaa ulaniny.

¹⁶Kyeendi lyo shamura-u mukee-u na muu kimaruma ekyi kyeni, naambo shikoore widimi lwakwa, na lyingyi naambo irina lyakwa lyiidukaniswa ulaniny koose.

¹⁷A yewe fika ulaalu mmbo kukee ikufumbisa tupu, kulakunde ilekeya vandu vakwa veende?

¹⁸Neewe lolaany, ndesi mmbo nshendee mmbwa ya masaawe niini nnu, na efo Misri nkulellywa-fo mfwanu wa vayo uka elyo fika inu-fo.

¹⁹Kweekyo ulaalu vavasya findo fyafo fyoose fikapywa mmba neefyo fikee maremeny, mashika wo nndu na woo ifisi ashekooywaa nreminy kulaore fyammaanga mmba mmbwa yeyo ya masaawe mmbo ishevawaa.’”

²⁰Vandu va Farao yewo valeita irero lya Nndumi Iruva mmbo valerishisa varundi na findo fyawo vakafyaata mmba,

²¹neeto alemina irina lya Nndumi Iruva kara varundi vakwe na findo fyakwe poo.

²²Nndumi Iruva kavia Mose, “Orrwa woko lwafo na iruveu naambo ikape mmbwa ya masaawe Misri koose, isheye vandu na mafisi moose na nyany ta efo Misri koose.”

²³Mose kaoroya woko lwakwe iruveeu, na Nndumi Iruva karika iruruma na mmbwa ya masaawe, na ukova lukakora-si; Nndumi Iruva keende mmbwa ya masaawe Misri koose.

²⁴Ikasha mmbwa ya masaawe iryani na ngova, mmbwa shiroo deny, kulaore ilellollywa Misri uka elyo vandu vekaa-fo.

²⁵Na mmbwa ilya ya masaawe ikakapa findo fyoose fyeekee poo mareminy, vandu na mafisi, Misri koose, mmbwa yeyo ikakapa fika na nyany ta mareminy, na wo nri ukafishwa-fishwa,

²⁶kuuta Gosheni kweni, efo Vana va Israeli veekai fo nkwesha-fo mmbwa ya masaawe-fo.

²⁷Farao karuma vandu vandevaanga Mose na Aron, neevavia, “Ni yeny shilyamarye, na Nndumi Iruva kava mmbwe wa usumanu, neeny na vandu vakwa lukava vakasha.

²⁸Tereveny Nndumi Iruva mashika maruruma yoo maniini affye ulaalu na mmbwa yeyo ya masaawe neeny nshemuningaa mumu mweende, mulakyikaa yaa mmwasi-fo.”

²⁹Mose kammbia, “Elyi nshukaa kunu muriny mmbo nsheipoiyoo Nndumi Iruva maako akwa na maruruma yoo ashemandaa, na nta mmbwa yeyo ya masaawe nyikishaa-fo, naambo kumanyi dede ulana elu llwa Nndumi Iruva.

³⁰Kyeendi shiishi deny yewe na varundi vafo mmweereiye Nndumi Iruva-fo.”

³¹Kitani na Shayiri mmbo filelyamarwa, mashika nganu mmbo yeetiri fyaa fya vayo na kitani nayo ikavaa,

³²kyeendi kwiifo nganu kulore ilakapwa mashika llya yekee shidu.

³³Mose kauka muriny kwa Farao, kaipoiyo Nndumi Iruva maako akwe, maruruma alya na mmbwa ilya ya masaawe ikamanda.

³⁴Kyeeri Farao alelollya mmbwa na mmbwa ya mawe na maruruma alya ammanda, keengera ullyamari, kaumisa nrima wakwe, na varundi vakwe.

³⁵Nrima wa Farao ukava muumu, nta nalaniinge vana va Israel mumu veende; shaasa Nndumi Iruva alerera na kana kya Mose.