Read BIBILLYA Mareiyo Meele a Iruva YOBU 14 Bible Online

YOBU 14 - BIBILLYA Mareiyo Meele a Iruva bible

YOBU 14

¹Nndu ni mwana mwiire ni nndu nka; mmbo akaa na muu mikonu myaangu iishwe ngatara.

²Kavaa sha kivaro, numa kanaa. Karisha swany sha kirishe kamaya.

³Woi Iruva, a nkyikyi kwasara kumande ilola na ipooka ivakyana nawe?

⁴Mmbi ashiidimaa yuuta kindo kisha kyuuke kindony kitefusu? Nkwiifo nndu ashiidimaa-fo.

⁵Mikonu ya nndu wa vandu ya ikaa na muu mmbo ikee sheese; woi, Iruva nkuvikye yekyena na miiri yakwe; Na shiidima ikillya nnyanu kummbikye-fo.

⁶Lolaany kwaasha nta kunre; naidimi ifurya mikonu yakwe sha nndu wa weesi lwa nkonu.

⁷Mashika nri ukammanywa kwiifo nsia wa immya, ushiidimaa ioria lyingyi.

⁸Naakwaa miraari ya vayo ikuuya uterinyiny, na kisinde kya vayo ifiyaa sumbai,

⁹Indi kwa nsiny wa mura nsi ukaorya; ukalambara maramba sha fyaana.

¹⁰Indi nndu mmbo afwa na elo nlo ufishyony lwakwe. Kammaa ikumba muu nkyi asaa nakyo?

¹¹Sheelyi mura uumya iruweny, na mfongo ukamanda isoka,

¹²n nyindo nndu afwee nta nnakupoo lyingyi-fo; nnakupoo lyingyi nta iokkya-fo, kumande elyo ngyina isheukaau.

¹³Ngoma kweshisurumaa kwa vafu; kushisurumi kumande nyashi yafo yafwaa; na fyeeri efyo kushiesye fikansia kweshikummbwaa.

¹⁴A nndu kamfwa ashiidimaa iruka lyingyi? Mikonu myoose ya mirundye yakwe mmbo shivereyaa kutani nkonu wakwa wafika.

¹⁵Llyo kweshivaangaa shikuirikye, kyeeri kwekundaa ishillolya yeny kyuumbe kyafo.

¹⁶Llyo kweshiidimaa yekena myeengye yakwa, nkweraa illa nnu ulyamari lwakwa.

¹⁷Marekwa akwa nnyafungywaa nkusheny, neewe nkweshekkyaa uravi lwakwa.

¹⁸Indi fisheshaa fyeeri mafumbu avundukaa na masimamba moomu nasamirwa ando a vayo.

¹⁹Mweeko wa mfongo mbukombaa myaamba ukatuula nguka. Nyindo neewe kulyamaraa ivika nsia lya nndu wa vandu.

²⁰Yewe mmbo kwatuula nndu, nawe kasarumya llung'anu, kwaalasha kisangu kyakwe kwamweera kwaasha.

²¹Vana vakwa vakaindywa we nneeshi-fo. Vakainyalwa we nnalolye ttwa fo.

²²Nyeeta mavavio a nyama takwe nsi, na ndiyyo wa mavavio a muu wakwe.