Read BIBILLYA Mareiyo Meele a Iruva YOBU 2 Bible Online

YOBU 2 - BIBILLYA Mareiyo Meele a Iruva bible

YOBU 2

¹Kukava lyingyi nkonu ungyi, vasu va Iruva veenda ikwanannya mbee ya Iruva, nawe satana kakoora da amwi nawo.

²Nndumi Iruva kavesa satana, “Nkwi kwauka yewe?” Nawe satana karouwa, “Mmbo shauka iruarua na irunguka ulaniny.”

³Kavia Satana, “A ndesa kwammilla ishinga lyakwa Yobu? Ulaniny nkwiifo ungyi akee shawe-fo. We ni nndu mworotu, mwiindya Iruva na mwiikwiisa na uravi. We mmbo akee nndu nsaari na mwoorotu ra na elyi kuleshaaya naambo shimmamite kyaruu.”

⁴Satana karouwa, “Shonnyi na shonnyi! Nndu wa vandu mmbo aniingyaa wo kindo atiri kwa ikira muu wakwe.

⁵Indi ulaalu nkyeorrwa woko lwafo kumpaani mwiili wakwe; shakuvia mmbo akwaararaa paa.”

⁶Naasa kavia Satana, “Kyasya! Kushiidimaa intannya shaasa kukundaa indi kulammbwee-fo.”

⁷Naasa Satana kauka mbee ya Nndumi Iruva kalisa Yobu ukiva kammbika fyaasha fikasha uka uvayo lwa urende fika urorony lwakwe.

⁸Yobu kaipoo woyo, kakusuva nalo na ikaa ifuny.

⁹Nka wakwe kammbia, “Kwiifo da kushiindya Iruva? Nkyeni kwelyamara kufwe.”

¹⁰Yobu karouwa nka wakwe, “Yewe mmbo kwarera sha nka nrung'ani. Elyi kulewarya findo fisha fyuuka kwa Iruva, a ni indaany kulemaa iwarya na efyo fikasha fyooka kwakwe?” Naakwaa nyeli efyo fyoose filenkooya, Yobu nyalerera nta irero lya ilyamarya Iruva-fo.

¹¹Mbuya vararu va Yobu: Elifasi aukye Temani, Bilidadi aukye Shua na Sofari aukye Naamathi, valeita renga shoose tilewoya Yobu. Naasa vakakuvaanga veende amwi indevikya Yobu kilyilyika.

¹²Kyeeri valenlolya vekee kwaasha nta valemmanyi. Naasa vakaonisa ngyunyanga vakaffwa; vakarandwa soori tawo. Vakafalya kiluulyi mirweny yaawo.

¹³Nalyo vakakaa rembo uteriny amwi na Yobu andu a mikonu mfungare kio na nsanyiny, nta valarouwe kindo ni elyi valelolya ukiva lwakwe shaasa lung'ani nnu.