Read BIBILLYA Mareiyo Meele a Iruva YOBU 28 Bible Online

YOBU 28 - BIBILLYA Mareiyo Meele a Iruva bible

YOBU 28

¹N dede kwiifo kundo fesa tisumwaa, Na ando saabu isanngywaa.

²Vandu mmbo vasumaa minya yuuka uteriny, Vakaeta minya ya arera uka maweny a wuuru uniini.

³Veesuma firori mmbo veendee taa ireeminy, Vakasununda waasha lwa yeenda-si Na isuma mawe a wuuru uniini efo ireeminy lya makimima.

⁴Nndu wa vandu mmbo asumaa marina kwaasha na ando vandu vakaa, kwaasha na vandu ando alafikwaa, Veesuma mawe yoo mmbo vakununutaa na fyoove.

⁵Uka uteeriny mfo shoonga yuuka, Indi si ya vayo wo kindo kiraratwaa mmuro.

⁶Efo maweny a vayo mfo kundo findo fya fwana ya kilaamwi fikai na uteeri lwa vayo lutiri funga ya saabu.

⁷Shia ya yeenda efo firoriny efyo Nkwiifo ndeye ilyee nyama iishifofo; Nta iriso lya ngoru llilellyafo.

⁸Mafisi eenda kwa ukushombi n nalavaria fo-fo, Nta miiso ntilemiira fo-fo.

⁹Vandu mmbo vasumaa masimamba moomu deny, Vakasuma mafumbu na iyasambuya kwaasha.

¹⁰Vakasuma mifongo nnang'ani ya mawe akwaalye si, Na iriso lyakwe likalollya findo fya uruu.

¹¹Vakafindikira soka tilaeke, Na isukkua findo fisurumyi.

¹²Indi urango usha luwonikaa kwi? Nkwi kuwonikaa umanyo?

¹³Nkwiifo nndu eeshi uuru lwa urango usha-fo, Nta urango usha lluwonikaa urukeny kwa vandu vakee na muu-fo!

¹⁴Ndillyi ta mura mmbo tikeamba, “Urango usha llukee kweru-fo.” Na yeeve likaamba, “Llukee kweru-fo.”

¹⁵Urango usha llushiidimaa ivonika kwa saabu-fo, Nta kwa yeesa fesa shiingyi-fo.

¹⁶Nnyivaa yeesa na saabu ya Ofiri-fo Nta findo fya uuru fya Sardoniki ao fya fwana ya King'arwa-fo,

¹⁷Saabu nta kioo m fiinani nalo-fo Nta nnyivaa ialasha na findo fya uuru fya saabu shisha fo.

¹⁸Urango usha mmbo lukee lwa uuru uniini ngota matumbawe na marijani, Wuru lwa vayo mmbo luilannyi lwa lulu.

¹⁹Topasi ya Esopia nnyivaa iinaniswa nayofo Nta nnyivaa ivikwa uuru lwa saabu shisha-fo.

²⁰Naasa urango usha mmbo luuka kwi? Nkwi umanyo luwonikaa?

²¹Llukeusurumi misony a fyuumbe fyoose fikee na muu, Na ndeye ta ngini-u ntishiidimaa ilulollya-fo.

²²Naakwana ni vafu mmbo vakee-yaamba, “Lwamiita kyorongye kya vayo na maarwi eru.

²³Iruva mmbwe eeshi shia ya urango usha, Eeshi ando luwonikaa.

²⁴Mashika we eeshi fika ufishyony lwa ulana, Nnyalollyaa wo kindo si ya ngina.

²⁵Kyeeri eeninga uraato uroo lwa vayo, Na yeesya mira minyanu ya vayo;

²⁶elyi erummbwa mmbwa ikape kwi, Fimwii na ngova fiire kwi;

²⁷Yoondo nlyo elollya urango usha na ilukapya weele, Kaluvangisa na iluesa.”

²⁸Naasa Iruva kavia nndu wa vandu: “Lola! Iindya Nndumi llo urango usha, Na ikaa kwaasha na uravi llo umanyo.”