Read BIBILLYA Mareiyo Meele a Iruva YOBU 31 Bible Online

YOBU 31 - BIBILLYA Mareiyo Meele a Iruva bible

YOBU 31

¹Shankufinga yeny shimuni, Miso akwa nyelola mwana wa kyika kwa lango?

²Ao ndesa n kyokyi shivereye kyuuka kwa Iruva akee uwe? Iruva muni finya nkyokyi ashideesye?

³A ngatara ntiwoyaa vandu varavi Na urumato valya vetana makasha?

⁴Ndesa Iruva n neeshi shya takwa Na imanya myeengye yakwa myoose?

⁵Kwa kooya shilekaa na muu shilalyaa wongo Kwakooya shilelava ilemba vandu,

⁶Iruva nasheese efo meseny a yeesa a usumanu, Nawe mmbo alollyaa sheelyi nshirenngya-fo.

⁷Kwa kooya marende akwa arekkye Nrima wakwa ukalatya lango ta miso akwa, Kwa kooya maako akwa atefussywa ni ulyamari,

⁸Nrikye wakwa uliwe ni nndu ungyi, Fimu fyakwa fiiluwa nndeny

⁹Kwakooya nrima wakwa velanga nka va nndu, kwakooya shilevallya mwangony kwa nndu wa nnyanu,

¹⁰naasa nka wakwa nakorye mmi ungyi, na womi vengyi vakee nawe.

¹¹Kindo yekyo ni uravi ukasha, uravi elo nkuti mwirumbwa mwaandu naumisye mwitana indo.

¹²Urekwa lywakwa mmbo lywevaa sha muro, wa imamita na irumata, na ikora fimu fyakwa fyoose.

¹³Kwakooya shilelema mwaandu wa ishinga lwakwa, lya womi ao lya kyika, kyeeri valeshengye mwaandu wawo.

¹⁴Nkyoki shitanaa Iruva kanshikulumba? A ndesa nshirouwaa kyi?

¹⁵Mashika Iruva mmbwe ashuumbye yeny na ishinga lyakwa; We mmbwe aluumbye yese loose.

¹⁶A, mmbo shilekooya iima ngwera kindo kintinnyi Ao iallwa vaka va dingu vakivika nsia kya ruu?

¹⁷A, shilenlya shoonga yakwa shimuni, Kulaore shareeya vana va ngwera nawo vawoni kindo?

¹⁸Oode! Uka ukoo lwakwa mmbo shileva mwivalela, Uka shekee mwana mmbo shilesongoya vaka va dingu.

¹⁹Ndesa shilenlola nndu efwaa atura soori, Ao ngwera alatiri soori yeeraa,

²⁰kulaore shanninga nrikye na soori ta mafwaa a moonri akwa Nawe kashikundya mbora ta kyaanu kya nrima?

²¹Kwakooya shilemmwoorrwa woko mwaanduny mbee ya mwana wa ngwera Naambo mwirummbwa mwaandu ashikunndye,

²²naasa yeeva lyakwa lyiiluke Woko lwako lumushuke lukuukkye-u.

²³Mashika ngatara yuukkye kwa Iruva ni kindo kya yeerese kwakwa; Yeny nshishiidimaa isisirya unini lwakwa-fo.

²⁴A ndesa nshivikkye nsia saabuny Ao shilemivia saabu shisha, “Yewe ni unapwe lwakwa.”

²⁵A mmbo shilenkooya ikushela kya wiingyi lwa usimba lwakwa, Ao ikushobya umasi lwa maako akwa?

²⁶Kwa kooya shilellola mwi wivaa, Na mwiiri ushiiraa usheny lwa vayo,

²⁷Na nrima wakwa ukaeswa ifiindya, Na yeny shamiminda maako akwa kwa wiindi lwa vayo,

²⁸Elo nalo mmbo lwevaa uravi lwa utuuruwa mwirummbwa mwaandu Mashika mmbo shevaa nkunang'ari mbee ya Iruva akee uwe.

²⁹Ao ndesa shilenfuria irumaka lya nkiduva akwa, Ao shafura elyi awonisa renga?

³⁰Ode! Nshilera kana kyakwa kanrera kikasha-fo Kwa idenga naambo nafwe.

³¹Varundi vakwa woose mmbo vakeamba paa Wo nndu muny alewarya kyeny kwakwa.

³²Nndu wa kyaaro n nalelala poo ya mmba yakwa fo, Mmbo shileruya nndu ashiiraa shia mmba.

³³A ndesa shilelema efyo shilerenga sha vengyi? A shilelema ikurya ulyamari lwakwa?

³⁴N shileereya isalala mbee ya mamwiingyi wa vandu Nta isya do ao ikuraya mmba Vai kwa iereya iereswa nfiila fyawo.

³⁵Ngoma kwakooya eiyo nndu wa ishiaranya: Mmbo shishiidimaa ivikau woko lwakwa kwa wo kindo shishaambaa. A nke Iruva muni finya ashirouwe! Ngoma efyo vakiduva vakwa vakeshikumba nafyo fyeriywaa!

³⁶Mmbo sheraa na ukushobi myeveny akwa Na irungutya nrweny sha ureto.

³⁷Mmbo sheekennya Iruva wo kindo shiletana, Mmbo shemwengyaa sha nsero wa mangyi.

³⁸Kwa kooya shiivye uteri elo shikee rema Shatereva mifongo yakwe iiye,

³⁹Kwa iwonisa fimu fya vayo kulaore shataya. Na iva kiteve kya ufu lwa veni

⁴⁰naasa miinga imye fo ando a nganu Na mambekye ando a umbi. Umando lwa marero a Yobu