Read BIBILLYA Mareiyo Meele a Iruva YOBU 32 Bible Online

YOBU 32 - BIBILLYA Mareiyo Meele a Iruva bible

YOBU 32

¹Naasa vandu yewo vararu: Elifasi, Bildadi na Sofari vakara irouwa Yobu kimmba alekulollya sheelyi atiri usumanu.

²Llyo Elihu mwana wa Barakeli, wa ufyari lwa Busi wa mmba ya Rama karoywa ni unyafi. Mmbo erooywa ni unfyafi kimaruma kya Yobu nyellyi Yobu mmbo ekulollyany akee nsaari ngota Iruva.

³Lyingyi karoywa ni unyafi kimaruma kya vambuya vararu va Yobu kimaruma valetura kya ivia Yobu na kwa yekyo kikaora sheelyi Iruva mmbwe alerenga.

⁴Elihu mmbo alemalallya sau kyeeri vamiku yewo vekee rera na Yobu kimmba we ekee mwana nkoo munnyo ngota wo.

⁵Indi kyeeri alelollya vandu yewo vararu vanlemwa irouwa Yobu karoywa nnu nngoo.

⁶Naasa Elihu mwana wa Barakeli wa ufyari lwa Busi kapooka irera: Yeny m mwana nkoo, yeni mbakuu mmwaasi; kwa yekyo mmbo shileiryaa imuvya makusaro akwa.

⁷Shaamba nriminy wakwa, “Ra vandu vatiri mikonu miingyi varere, vatiri mikonu miingyi valoshe urango usha.”

⁸Indi mumuyo eto ukee nnang'ani ya nndu, mumuyo eto wa Iruva muni finya, nto uniingaa nndu wiidimi lwa imanya.

⁹Nshi kuti kuve mmiku llyo kuvaa na urango usha-fo nta vamiku nshi-wo-nsi vakwaani imanya kindo kikee kya usumanu-fo,

¹⁰kwa yekyo shaamba, “Shyaa rannyiny, shaambe makusaro akwa.”

¹¹Naasa yeny mmbo shilevera yekyo mukundye irera, shaarannya mirerye yaany ya urango usha, kyeeri mwekeruuya fya irera.

¹²Shilemwaarannya na nshusshwa deny, indi n kwiifo nta umwi waany aleidima ivinga Yobu fo; woose mmbo mulelemwa irouwa marero akwe.

¹³Kwiiseny mulasheamba, “Ulaalu lwam mbona urango usha. Ammbingaa ni Iruva, nshi nndu wa vandu fo.”

¹⁴Marero a Yobu n nyekee kimaruma kyakwa fo, kwa yekyo nshinrouwaa sheelyi yeni mwekenrouwa fo.

¹⁵Yeni mwamising'ang'a; mwanlemwa, yeni mmutiri kya irera mmwasi fo.

¹⁶Ndesa shavera da kimmba mulakee rera, kimaruma mmukee sau mularowaa kyindo mwaasi?

¹⁷Yeny nshuuta kirouwo kyakwa; yeny shishuuta makusaro akwa.

¹⁸Shitiri marero meengyi deny, nrima wakwa ukeshikuna irera.

¹⁹Nrima wakwa wamisshwa sha mfinyo ukee nsirye sha nakori ya mfinyo mwiiya ikee kufii iriike.

²⁰Nkuti shirere naambo shiwoni yaanguywa; kishikooye shitarammbwe kana shirouwe.

²¹Nshikunndyaa nndu-fo nta irera marero a ilelemba nndu-fo,

²²mashika yeny nshishi ilelemba nndu-fo, kulaore ni indo, Muumbi wakwa mmbo eshimamitaa.