Read BIBILLYA Mareiyo Meele a Iruva YOBU 33 Bible Online

YOBU 33 - BIBILLYA Mareiyo Meele a Iruva bible

YOBU 33

¹Ulaalu Yobu arannya marero akwa; arannya marero akwa moose.

²Lola mmbo shiketarammbwa kana kyakwa, yee, ulumi lwakwa lurere.

³Shireraa kikwaani na nrima wakwa; yefyo shiishi shifirere na usaari.

⁴Mumuyo wa Iruva mmbo weshiumba, na mumuyo wa Iruva muni finya ukashiniinga muu.

⁵Shirouwa kwa kooya kushiidimaa, songosya marero afo nisha mbee yakwa kutire worotu lwafo.

⁶Yewe n kyimwi mbee ya Iruva; na yeny da mmbo shikeemwuumbe na uteri.

⁷Kwa yekyo nkutiri kimaruma kya ishiereya fo; marero akwa maroo n nyakuroviaa fo.

⁸Dede nkwarera na yeny sheeta; shammiita fyoose kwarera.

⁹Yewe kwaamba mmbo kukee nsaari nta nkwiifo kindo kurenngye-fo, kukee mwaa pya kulatiri mbese;

¹⁰kwaamba Iruva mmbo akuruiya kimaruma kya ikutuula, na ikwaallwa sha nkiduva wakwe.

¹¹Akee kufinga mise marende, na iisa myeengye yafo myoose.

¹²Indi Yobu shakuvia yoo kwammira mbai. Iruva ni niini ngota nndu wa vandu.

¹³Nkyikyi kuwakyanaa nawe, kwa rera mmbo araa alekurouwa yekyo kyimwi kwa mmbesa?

¹⁴Kyeeri Iruva akee rera mmbo arera na shia imwi, ao shia ingyi indi nndu nnamaanyaa fo.

¹⁵Iruva mmbo areraa na vandu maoryieny kyeeri rwe shiroo tavavoya,

¹⁶elyi varengeya fitareny fyawo. Yoo mmbo aruyaa vandu maarwi awo; kavaerese na myoore akwe,

¹⁷vakooye ilakana na mitannyi yaawo miravi, na ilakana na kiila kyawombee ya vandu.

¹⁸Indo llyo akingya nndu nalamamike, muu wakwe ulamamitwa na usu.

¹⁹Iruva mmbo akangaya nndu na mavavio kambika kitareny, mavavio alasyaa akatira malungo akwe;

²⁰nawe katura isanga lya ilya, naakwan shoonga shisha kaisswa.

²¹Mwiili wakwe kaniiya kutani alamanyikaa, na mafua akwe akusurumyi akalollywa paa.

²²Mmbo akee kufii deny na yaanga kifuny, na muu wakwe kufii na vallya vaendee ufu.

²³Indi nsu akee kufii nawe, umwi nnang'ani ya mafiku a vareri va Iruva, naambo vamwoore kindo kisha kya itana.

²⁴Kanlillya kavia Iruva, “Nkire nalaange irininy, shitaa sye ando akwe.”

²⁵Yoo llyo mwiili wakwa uvaa sha wa mwana nkoo, ashiidimaa iwuyya lyingyi finya takwe ta ukoo.

²⁶Llyo aterevaa Iruva na iirikkywa, ashaa mbee yakwe kwa ifura, na Iruva ambiiryaa se utore lwakwe.

²⁷Ashekapaa nndoro mbee ya vandu na yaamba: “Mmbo shetana ulyamari na ireta usumanu, na yeny nshekapwa mashika a vayo fo.

²⁸Iruva mmbo eshikira shilarumikkye irininy; shansaa na muu na ilollya sa.”

²⁹Lola Iruva mmbo atannya nndu wa vandu yaa moose, lyingi kavii ao kararu.

³⁰Mmbo akiraa nndu wa vandu nalarumikkye irininy, alollye sa ya muu.

³¹Arannya Yobu, shiarannya na nshusshwa; malallya sau shireraa.

³²Kwa kooya kutiri kya irera kurouwe, rera mashika mmbo shikunndye ikuekena sheelyi nkutiri mbese fo.

³³Kwakooya n shi indo malallya kwa shaarannya, malallya sau shikufunde urango usha.