Read BIBILLYA Mareiyo Meele a Iruva YOBU 37 Bible Online

YOBU 37 - BIBILLYA Mareiyo Meele a Iruva bible

YOBU 37

¹Kyuuka na yefyo, nrima wakwa mmbo ukeererema, na ikillya uka ando avayo.

²Arannyiny iruruma lya unyanga lwa Iruva, na ndiiyo wa unyanga luuka kaniny kyakwe.

³Kalwaalwa lukwaani si ya iruveeu koose, fimwii fyakwe fikwaanisa taari toose ta ulana.

⁴Llyo ungyanga lwakwe loonaa, unyanga lwa Iruva mmbo loonaa kwa utore na kyeeri yekyo kyoose fimwii fyakwe fikamikamika.

⁵Iruva mmbo akapaa ukova lwa wende na unyanga lwakwe, mmbo atanaa findo finiini kulashiidimaa ifimanya.

⁶Mmbo awia laura ya kyaamwi, “Wa uwe ya uruka!” Na uwiwita lwa mmbwa, “Kapa kwa finya.”

⁷Mmbo afingaa mashora a wo nndu; naambo vandu vamanyi mashora akwe.

⁸Mafisi a ngoroshon mmbo awuyaa ando a vayo a iovya, na isaa mbangeny ta vayo.

⁹Matundulu mmbo aukaa kiryeny kwakwe, na mbyoo shinyaasi nnyuuka mbesheny yakwe.

¹⁰Kwa mumuyo wa Iruva laura ya kyaamwi nnyishaa, na kisangu kya mura kikauma uviny.

¹¹Iruva mmbo aishuraa ifishi uwiwita uroo; mafishi akakwaanisa fimwii fyakwe.

¹²Kwa ivavaso lyakwe fyoose mmbo firungukaa efo na efo, iinutya wo kindo avavasa, kitanyike ulaniny lwa fyuumbe.

¹³Iruva mmbo ainutya a yekyo akunndye ulaniny; kiwe ni kya iorota vandu, ao kya iora ikunda lyakwe.

¹⁴Kikukooya kuarannyi Yobu; malallya kwaarannyi ngyende ta Iruva.

¹⁵A, kwiishi ngata Iruva aniingyaa mavavaso akwe, na itana fimwii fya mafishi akwe avarami?

¹⁶A, kwishi shaasa mafishi akaa nginii-u? Mmbu mashora a Iruva a ngyende ta ulya akee nsongoru wa umanyo!

¹⁷Yewe nkulollye mmbo nkuree soori ta nrikye nnu, kyeeri uraalo lwa mbyoo lwawoya uruka.

¹⁸A, kushiidimaa, yaala ng'ina sha we tive shuumu sha kilola kya arera?

¹⁹Luloshe kindo luviaa Iruva; mashika marero eru nnyakeemanyika-fo llukee ireminy.

²⁰A, mmbi akaraa imbia, Shikundye irera neewe? Mmbi ashaamba awoni renga?

²¹Paripari nndu nnashiidimaa ilolya fo: Mwi wansurumwa numa ya mafishi, na uraato lwammayya ngina!

²²Mmbaramu nsha wallollyo taari ya ndoo; Iruva mmbo arungukkyo ni nnduma wa yerese.

²³Iruva muni finya alavaa ifikkywa ni nndu, widimi na waarya lwakwe mmbo luuke uniini, mmbo eeshwe usaari nta nnyaretaa usumanu ttwa-fo

²⁴Kwa yekyo vandu woose mmbo vamwereyaa; we nnating'waa nyi nndu moose atiri ngoo shuu-fo.