Read BIBILLYA Mareiyo Meele a Iruva YOBU 4 Bible Online

YOBU 4 - BIBILLYA Mareiyo Meele a Iruva bible

YOBU 4

¹Naasa Elifasi ulya Ntemani karouwa Yobu;

²A ndesa nndu kakurouwa kirero kusua? A mmbi ashiidimaa isisirya irera?

³Arannya! Yewe mmbo kulellosha veengyi, na itumarisa maako a vafwafwa.

⁴Marero afo akaviirya valya vemfwa nrima, nkuletumarisa veturye finya.

⁵Indi ulaalu mmbo fyakukooya yewe kumuni, neewe kwatura usisiryo, fikakupaana neewe kwasavaa.

⁶A ndesa ikusirya na Iruva n shi kyo kindo kuvikkye nsia? Na worotu lwafo nshi kyo kindo kukusirye?

⁷Kusare ulaalu: Mmbi nalatiri ulyamari alensarumya? Ao ndesa vandu vasaari valemmerwa sakeny?

⁸Kindo shiishi yeny vevaaya uravi na ukasha mmbo vailulaa fyo fyeni

⁹Iruva mmbo avamamitaa na mumuyo wakwe, yewo mmbo vamamitwaa kwa ngapo ya nyashi yakwe.

¹⁰Varavi mmbo vadinaa sha miiso shinyaasi, indi mayoo awo mmbo afishwaa.

¹¹Miiso itiri finya mmbo ifwoo elyi yatura kyeelya, na vana va miiso ya kyika vakananatwa.

¹²Nkonu umwi, mmbo shevio kindo kirika, kuri kyakwa kakaita kiviriviri kyavayo.

¹³Shekee makusarony a moorya lya kio, kyeeri rwe shiroo titiraa vandu.

¹⁴Shawoyony vereerei sharerema, mafua akwa moose akateruka.

¹⁵Uraato lukaira mbee ya kisangu kyakwa, fii ta mwiliny wakwa tikaenda saafu.

¹⁶Kindo kikasalala sau mbee yakwa kyeeri shilekilola nshilekimanya twa-fo. N kweiyo yuumbo iwe mbee yakwa; kukava kimamia sau, numa shaita unyanga.

¹⁷Nndu wa vandu ashiidimaa itira usumanu mbee ya Iruva? Nndu ashiidimaa iva mwaa mbee ya Muumbi wakwe?

¹⁸Naakwaa ni varundi vakwe, mmbo nnatiri nawo kikusiryo-fo; na vasu vakwe mmbo avalollya verenga;

¹⁹Kilanya nndu wa vandu fyuumbe fya uteeri vandu vaparikkye kilulyiny, vashiidimaa ikonindwa konindwa sha minya.

²⁰Vandu kwa fyeeri fyaangu deny vamanya imamika; mmbo vamamikaa llung'anu nta valare wende lwawo!

²¹Kwakooya uruu lutirye muu wawo lwarumbuwa wo mmbo vafwee nta valatiri urango usha.