Read BIBILLYA Mareiyo Meele a Iruva YOBU 40 Bible Online

YOBU 40 - BIBILLYA Mareiyo Meele a Iruva bible

YOBU 40

¹Nndumi Iruva kaengera ivia Yobu:

²“A, yewe mwisununda urekwa mmbo kuvakyana na Iruva Muni finya? Yewe kukellya ulai na yeny Iruva naasa rouwa mbony yeti!”

³Llyo Yobu karouwa Nndumi Iruva:

⁴Yen nshivaa kindo-fo mmbo shikurouwa-kyi? Mmbo nkesanda kana kakwa.

⁵Mmbo shilekara irera na nshireraa lyingyi-fo. Mmbo shilerera kavii indi nshishyengeraa irera se-fo.

⁶Llyo Nndumi Iruva kanrouwa auka efo kitita-siny:

⁷Kufinge sha nndumi. Shikuvese neewe kushirouwe.

⁸A, mmbo kukundye dede iyalasha mirumbuye yakwa, ishilollya shanrenga naambo yewe kulave na teve?

⁹A, nkutiri finya sha Iruva? Kushiidimaa idina na unyanga sha lwakwa?

¹⁰Naasa, koore iva na utore na uniini, kwaambike na usuri na utore.

¹¹Pusuya vandu unyafi lwafo uniini; lola wo atiri ngoo shuu na intuula si.

¹²Lola vo atiri ngoo shuu na immbundwa, kuvavare varavi ando vakai.

¹³Varike woose uteeriny; finga wo umwi na kifingyo kya ufu.

¹⁴Llyo shikumanyaa, sheelyi finya yafo kumuni yankuniinga uvingyi.

¹⁵Lola ikindo lilya Behemoti, llya shiliumbye sheelyi shilekuumba yewe. Yelyo mmbo lilyee mare sha ng'umbe,

¹⁶indi mwiiliny lyitiri finya wende, na ullya lwa ndewuny ya vayo lutiri finya nnu.

¹⁷Mmbo lyaalua nkya wa vayo ukava muumu pony sha nri, miraari ya fisouwa fya vayo ikafumyo ando amwi.

¹⁸Mafua a vayo m marere a arera, fyungo fya vayo n sha mabau a minya.

¹⁹Elyo n lya mbee lya wende nnang'ani ya fyuumbe fyakwa! N nyeny Muumbi wa vayo shishiidimaa ilyivinga.

²⁰Fidoorony kundo mafisi moose a ngoroshony atavanaa nnyautaa shoonga ta vayo.

²¹Mmbo akulalyaa si ya ngorosho ta miinga, na ikusuruma masuny maruveny.

²²Mmbo akusurumaa firisheny fya miinga na miri imyaa mbai ya mura.

²³Mura ukasoka n naereaa-fo, llyeereyaa naakwa mura wa Yordan ukasoka ukafika kaniny-fo

²⁴Mmbi ashiidimaa ilifinga miso na ilyiwara mfungwa? Mmbi ashiidimaa ilidosha mmbwa ao ilitira na nreiyo.