Read BIBILLYA Mareiyo Meele a Iruva YOBU 6 Bible Online

YOBU 6 - BIBILLYA Mareiyo Meele a Iruva bible

YOBU 6

¹Yobu karouwa Elifasi:

²Nkyeny i kwakooya isavaa lyakwa lyeeswaa uroo lwa vayo, ilyiswa ukiva lyakwa livikwa meseny ya yeesa.

³Mmbo lyevaa iroo ngota nsanga wa mbai ya yeeve. Nkyo kimaruma sharera ree!

⁴Ee, mife ya Iruva, muni finya yammaa ishidosha; muu wakwa ukana suumu ya vayo. Weeresi lwa Iruva lwanshiwoya.

⁵A ndesa kyoongo kya ngoroshony kyaana kweiyo mare, ao ng'umbe yetiri shoonga?

⁶A ndesa kindo kilatiri nrolo kivaa ilya kilatiri shumbi? A ndesa mura wa ipore utiri nrolo moose

⁷N shitiri isanga lya ipaana shoonga eto fo, eto ni shoonga takwa shitisuuye.

⁸Nkyeni kiterewo kyakwa kyeirikkywaa, Iruva nashiniinge kilya shilanngye:

⁹Sheelyi esheekyaa ishipopora-popora, aorrwe woko lwakwe a shinutuye kwaasha!

¹⁰Yekyo nkyo kyeshiviiryaa muu, mmbo shefuraa kunu mavavio alatiri ulyilyi.

¹¹Indi nshitiri finya ya idima yeenda na mbee-fo; nshiishi mafurumyony akwa ushevaa inda-fo, shiidimi isisirya.

¹²A finya takwa tikee sha ta mawe? A mwiili wakwa sha arera?

¹³Ni kya dede kwakwa nkwiifo kyeeshekkya-fo; weekyi loose lwammuuka kwakwa.

¹⁴Nndu alemaa ilyilya mbuya yakwe, mmbo alema iindya Iruva muni finya.

¹⁵Mbuya takwa mmbo vashilemba sha usoka, vakashilemba sha soko ilatiri mura.

¹⁶Yeyo iishwe mura muumu sha iwe, na laura ikusurumyi nnang'ani ya vayo.

¹⁷Indi kyeeri kya nrike mmbo isarumyaa, Kyeeri kya mwi mmbo tisaa soko tilatiri mura.

¹⁸Maronda mmbo arekaa shya yeeruuya mura, m vasaamaa kasa vakafiiya-fo.

¹⁹Maronda a Tema mmbo aruuya-ruuyaa, vandu va kyaaro va Sheba mmbo vavikaa nsia.

²⁰Vakasswa kya ivika nsia ruu, mmbo vafika sokony yeto vakassua.

²¹Yeni mmbo mwava sha soko yeto, mmbo mwalollya renga yakwa mukairyaa.

²²A shammaamba mushiniinge kindo kya nnga? Ao mushiniinge kindo kya mbaria na masaa any?

²³Ao mushiturunye ngyaleny ta nkiduva? Ao mushikire maakony a nsokyi?

²⁴Shilosheny neeny shimwaarannyi Shimanyisyeny shaasa shilerenga.

²⁵Marero a dede atiri finya shiniini! Indi usakiro lwany nkyokyi lukeshoora?

²⁶A mmbo mukusarye sheelyi mmushiidimaa yaorywa marero? Marero a nndu afiyye nrwe mmbo avakkye uraato.

²⁷Yeni mmukeekarya ikapya vana va ngwera kura; M mukee vesya uuru naakwa mmbuya tany!

²⁸Indi ulaalu shiloleny dwa. Yeny nshaambaa wongo mbee yaany fo.

²⁹Reny dwa kulasheeva na uravi;

³⁰A ndesa mmukusarye sheelyi shikee rera uravi? A mmbo mukusrye yenyy n shiishi findo fivavaa.