Read BIBILLYA Mareiyo Meele a Iruva YOBU 9 Bible Online

YOBU 9 - BIBILLYA Mareiyo Meele a Iruva bible

YOBU 9

¹Naasa Yobu karouwa

²N dede shiishi ni indo kikai. Indi nndu ashiidimaa inda iva nsaari mbee ya Iruva?

³Kwa kooya nndu ekaraa iwakyana nawe, nta nnashiidimaa ifika ando fo; nta irouwa kiveso kyimwi ando a kyiku fo.

⁴We mmbo atiri urango usha kilanya na finya shiingyi, m mbi alenkesa nawe, kavinga?

⁵We mmbo asamisaa mafumbu kulaore nta fimanyaa, kafisambuya kwaasha kwa unyafi lwakwe.

⁶We mmbo aring'isaa ulana lukauka ando avayo, na ngo ta vayo tikarinina.

⁷Mmbo ashiimaa mwi ulavaa, kasikkya nyinyiri tilamikkye.

⁸We muni alealau ngina na ivavara matundulu a yeeve.

⁹Mmbwe aletana nyinyiri ngini-u: Dubu, Orioni, Kilimia na nyinyiri ta sinde.

¹⁰Mmbwe atanaa findo finiini filandelolywa, findo fya wende filatiri yeekyenya.

¹¹Lolate! Mmbo ashiiraa kufii na yeny nta shilanlollye, naasa kaenda kyakwe kulaore yeny shammanya.

¹²Lola! We mmbo epoo akunda; mmbi ashiidimaa imwiima? Mmbi akaraa immbesa, “N kyokyi kuletana?”

¹³Iruva nnyasiikaa unyafi lwakwe; si yakwe m vakee kulema kwa werei Rahabu (Ishoka lya yeeveny) na veekyi vakwe.

¹⁴A shiidimi inda irouwa Iruva? Nkwi n sauwaa marero a immbya?

¹⁵Ra na elyi shilalya marye, nshishiidimaa inrouwa-fo. Nkuti interewa ashilyillye yeto nkumbi wakwa.

¹⁶Naakwaa shembaangaa nawe ashirouwe, n sheshiidimaa ikusirya sheelyi akeeshaarannya-fo.

¹⁷We mmbo ashisirya na matundulu; kaengera fyaasha fyakwa kulaifo kimaruma.

¹⁸Nnashiree nta shaeng'a-fo mu wakwa kauishura fyuure.

¹⁹Kwa kooya ni iwakyana, we mmbo atiri finya kilanya Na kwakooya ni itana fya usumanu, a mmbi amwuutya uvingo?

²⁰Ra na elyi shilatiri kindo shirengye, marero akwa meni mmbo eshiutyaa uvingo lla elyi shilatiri teve mmbo ashiring'isya sheelyi shikee nreti.

²¹Nshitiri mbesefo, indi yeny nshikuvikye nsia fo. Mmbo shisuuye muu wakwa.

²²Fyoose ni kyimwi, nkyo shaamba; Iruva mmbo amamitaa woose vasaari na varavi.

²³Renga iendee ufu lwa tiny, Mmbo lushekkyaa ngatara ya vandu valatiri mbese.

²⁴Uruka lukavikwa ushiliny lwa vandu varavi, Iruva mmbo arayaa miso a verumbwa myaandu va vayo. Kwa kooya nshi we atanaa indo a mmbi ungiiny?

²⁵Mikonu yakwa ikeenda sere m mwasi ya nndu arisha; ikarisha shilalollye mbusha.

²⁶Mmbo ikee risha nnu sha ngalava ya makongye, sha ngoru irumbukkyaa kindo ikyiwara.

²⁷Shaamba, “Shirekkywa idya lyakwa, shilakani na kisangu kya tingwa shive na ifura!

²⁸Indi mmbo shiereiye mavavio akwa moose, mashika shilollye Iruva n nashiekenaa shitiri usumanu-fo.

²⁹Kwa kooya shautywa uvingo, sheelyi shilyamarye a kyeekyiny shikuvinise ruu?

³⁰Naakwaa shasamba na laura ya kyaamwi, na isangya maako na sabuny,

³¹naakwaa nyindo mmbo ashoolotaa irininy lyitiri kirinda, na soori takwa shitilolye nkiraa.

³²Iruva nnakee nndu sheeny shinrouwe fo, kutani lwaidima ienda kwa veerumbwa myaandu amwi.

³³Nkwiifo mwiluleta nnang'ani yeeru we luleta ve vaviifo

³⁴Iruva nashiutye umbiri elo lwa ishikapa, na veresi lwakwe lulashimattwe!

³⁵Llyo sheshiidimaa irera shilatiri weerei, mashika n shiindo shikee muuny wakwa fo.”