Read BIBILLYA Mareiyo Meele a Iruva SABURI 102 Bible Online

SABURI 102 - BIBILLYA Mareiyo Meele a Iruva bible

SABURI 102

¹Woi Nndumi Iruva, arannya kiterewo kyakwa! Kiiyo kyakwa kyikuseny yewe!

²Kulashisurumi kisangu kyafo nkonu nkee ukyiveny Shilootya kuri kyafo nkonu nkuvaangaa kushirouwe swany.

³Mashika mikonu yakwa yaira veru Na mafua akwa akee imamika sha kyimwii kyikee yaaka.

⁴Ngoo yakwa yankapwa ikava sha mare, ikauma, Ee-da shikeeirekywa ilya shoonga yakwa.

⁵Kimaruma kya unyanga lwa idya lyakwa, Mwiili wakwa wamuuma pony ukasangya amwi.

⁶Shammba sha ndeye ya kasa nng'alo, Shavaka sha ifururu lya saminy.

⁷Mmbo shikee ilala shoovi, lyingyi shavaka ndeye, Ndeye ikee sheni mmbeeu wa mmba.

⁸Vakyiduva vakwa vakee ishiinyala nkonu piti. Mmbashisuuye sheelyi mmbo vatirwa ni usukwa, Mmbo vadengaa vesenda irina lyakwa.

⁹Mashika mmboshilellya. Na isasanda misoru na mura wakwa wa ina

¹⁰Kimaruma kya unyafi lwafo na unyaasi lwafo. Mashika mmbo kwashiipoo na isheera kwaasha.

¹¹Suku takwa tikava sha irya lyaoloka. Na yeny shanaa sha mare.

¹²Kya indi Yewe Nndumi Iruva kukee ishillya llung'anu. Kwakumbuwa ni marika na marika.

¹³Kwasalala-u kumuni, kwilyillya Sioni Mashika nkyo kyeeri kya ilyillya Ee-da fyeeri filederyo fyamfika.

¹⁴Varundi vafo valefurya mawe a vayo lla elyi akee mavundwe Na ilyillya kyilullyi kya vayo.

¹⁵Llony vandu va masanga vasheereya irina lya Nndumi Iruva. Na vamangyi woose va ulaniny vereye nng'anu wafo.

¹⁶Nndumi Iruva elyi ava ammaa itana Sioni. Kyeeri ashelollyo efo nnganuny wakwe.

¹⁷Ashearannyaa fiterewo fya nndu nkiva, Nnyasheinyalaa fiterewo fyawo-fo.

¹⁸Irika lyikeesha llyireiya findo efyo, Na vandu vashewonika numa vashearafumaa Nndumi Iruva.

¹⁹Mashika alolaa uka eele akwe kukee uwe Uka iruveu Nndumi Iruva alelola uruka.

²⁰Naaranyi idya lya nndu akee mfinge, Narwe vafungwa vakee vareiye iwawa.

²¹Vandu vavambise irina lya Nndumi Iruva efo Sioni, Na nnduma wakwe efo Yerusalemu.

²²Kyeeri vandu va masanga vashekuumbya ando amwi Ngyumangyi nato naambo tifurukannyi Nndumi Iruva.

²³Nndumi Iruva ammaangura finya takwa shikee nkoo, Amfiisa suku takwa.

²⁴Mmbo shishaambaa, “Woi Iruva wakwa kulashoondwe shikee nkoo-fo Myaaka yafo Nndumi Iruva ni kupookya irika kumande irika!

²⁵Yoo mapookyony mmbo kuleveiya uvasha lwa uruka Na ngina ni ishora lya maako afo.

²⁶Efi fishelyamarikaa, indi Yewe kushekaa-u llung'anu; Ee-da efyi fyishenkwaa sha soori, Elyi fyivakye soori, kushefyaalasha nato tishaalashika.

²⁷Kya indi yewe mmbwe ulya wa llung'anu; Na myaaka yafo nnyimandaa-fo.

²⁸Vana va varundi vafo vakaa kipwa Na ngyeeri tawo vasheikarwa usanguny lwafo.”