Read BIBILLYA Mareiyo Meele a Iruva SABURI 103 Bible Online

SABURI 103 - BIBILLYA Mareiyo Meele a Iruva bible

SABURI 103

¹Woi nrima wakwa arafuma Nndumi Iruva; Ee-da, fyoose fikee nnang'ani yakwa, Fyaarafumi irina lyakwa yeele.

²Woi nrima wakwa arafuma Nndumi Iruva, Nta kularekyo ilyillya lyakwe lyoose-fo.

³We mmbwe akufwaayaa ulyamari lwafo loose Kakushiisa ndwari tafo toose.

⁴Kakyira muu wafo ulandeerekya kifuny Kakuvika ureto lwa ilyillya na ikukyiyya.

⁵Kawuutisa ukuu lwafo mesha. Kwavauka kwawuya nkoo sha ngoru!

⁶Nndumi Iruva mmbwe atanaa findo fya usumanu Na yewo vafote kwavarumbuya mwaandu.

⁷Alerambuya Mose shia takwe Kaora vana va Israeli mashora akwe.

⁸Nndumi Iruva eeshwe isarya na ikiiya; Nnyarooywa nngoo uviny-fo, mmbo eeshwe ilyillya.

⁹We nnyasakyaa mikonu mmyoose-fo, Na nnyarooywa nngoo llung'anu-fo.

¹⁰Nta nnyalelutyannya kiinani na urekwa lweru-fo, Nta nnyalelutaiya kinani na maravi eru-fo.

¹¹Mashika shaasa ngina irooye uwe ya uruka Ni indo da ilyillya lyakwe lyikee iniini kwa yewo vamwereiye.

¹²Na shaasa taari ya ngama ikee kwaasha na taari ya nkwaany Nnyendo avikye ngyulyamari teeru kwaasha neese.

¹³Na shaasa ndeye wa nndu alyillya vana vakwe, Nnyendo Nndumi Iruva alyillya yewo vamwereiye.

¹⁴Mashika We mmbo eeshi yumba lyeru; Na ikummbwa sheelyi yese mmbo lukee kiluulyi.

¹⁵Mwana wa nndu suku takwe tivakye mare; Sha kivaro kya mbuveny nnyendo ashiininaa.

¹⁶Uraato lukaira-u, ate nkikiiyo-fo Nta ando a vayo nkukyimanyikaa-se-fo

¹⁷Indi ilyillya lya Nndumi Iruva lyikee kwa yewo vamwereiye Pookya llung'anu kufike llung'anu Na usumanu lwakwe kukafikkya vashuku.

¹⁸Mashika yewo veeringa nkundanu wakwe, Mmbo vakummbwa mavavaso akwe vakaatana

¹⁹Nndumi Iruva mmbo avikye kitima kyakwe kya usuri efo iruveu; Na umangyi lwakwe lukaitorya findo fyoose.

²⁰Arafuminy Nndumi Iruva, yeni vasu vakwe, Yeni vasero va finya veetana ekyo avavasye, Mwiishaarannya unyanga lwakwe.

²¹Arafuminy Nndumi Iruva, yeni matorito akwe moose Yeni varundi vakwe veetana nsia wakwe!

²²Arafuminy Nndumi Iruva, yeni mashora akwe moose, Kundo koose efo ashillyaa. Ee-da, nrima wakwa, arafuma nndumi Iruva.