Read BIBILLYA Mareiyo Meele a Iruva SABURI 104 Bible Online

SABURI 104 - BIBILLYA Mareiyo Meele a Iruva bible

SABURI 104

¹Ee-da, nrima wakwa arafuma Nndumi Iruva; Yewe, Nndumi Iruva, Iruva wakwa! Kwakwaambika wiidimi na itumbe;

²Mmbo kuree sa sha soori. Kwaala ngina sha soori shiniini;

³Kwavaakya ngo ta mmba ya orofa efo mureny. Kwaallwa mafishi akava mutika wafo; Na yeenda uwe ya maaru a uraato.

⁴Mmbo aallwa uraato varumi vakwe; Na sise ta muro kataallwa varundi vakwe.

⁵Mmbo avika uruka uwe ya nsuka va vayo Nta nlurinngina-fo.

⁶Kwaala yeeve uwe ya vayo sha soori, Na mura ukasikya mafumbu.

⁷Kyeeri kulekyeemya mura ukamalallya; Llya uleita unyanga lwafo ukarisha.

⁸Yakawunduka mafumbu-u kumande mareminy Yakafika alya ando kuyasongosye.

⁹Naasa kwavikya mura nnyanu, nalasheisikya ulana lingyi-se.

¹⁰Kwaruta ngyusoka efyo mareminy, Nato tikaira nnang'ani a findooro.

¹¹Nto taniinga mafisi mura wa ina, Mishungu ya ngoroshony ikauta nyura tawo.

¹²Ndeye tikatannya fifuri miriny ya mbai ya vayo, Tikakaa marambeny a vayo tikaimba.

¹³Kuuka uwe nginii-u kwanisa mafumbu na mbwa, Kwaishura ulana mbora ta vayo.

¹⁴Kwamiisa myoorwa yalyiwa ni efyo fya ivikya. Na fyeelyiwa ni vana va vandu, Tikeende shoonga tuuka uteeriny,

¹⁵na mfinyo wa ifurisa nndu, Mafura mesha afwaamaa akalookisaa, Na shoonga ya iniinga finya.

¹⁶Miri ya Nndumi Iruva iwuure Miri ya Lebanoni yeyo aleivaakya.

¹⁷Marambeny a vayo ndeye tikavika-fo fifuri fya vayo, Nansha kaallwa efo miriny yeyo kyeny kwa vayo.

¹⁸Efo mafumbuny maasha mfo kyeny kwa mburu ta ngoroshony, Na mbelele tikawonisa kundo kwa yoovya efo mbangeny.

¹⁹Mmbo kuleumba mwiiri uloore fyeeri Mwi nato wiishi kyeeri kya yooloka.

²⁰Kweende ireema, kio kyikasha, Na mafisi a ngoroshony akasomukya,

²¹Vana va miiso vakadina vawonise shoonga, Vakavera Iruva navaniinge shoonga yaawo.

²²Mwi ukamfuma mafisi yoo akawuya mbangeny tavayo Akakwiimurisa efo mbangeny.

²³Llony nndu wa vandu keenda mashoreny akwe, Na irunda mashora akwe kufike nnkwaany.

²⁴Ee, Nndumi Iruva, kurundye mashora meengyi nnu nnu! Fyoose mmbo kulerunda na waarya! Ulana mmbo lwiishwe fyuumbe fyafo.

²⁵Kulya kwaasha kwiifo yeeve itiri ivari yaasha, Mfo kwiishwe fyuumbe fyilavaa yeekyena, Fyuumbe fyiifo na muu, fyiniini na fyidu.

²⁶Mfo ngalava tilya niini tiira na Levi yatani ikyindo llya iniini nnu, Kulelyiumba litavani efo yeeveny,

²⁷Woose mmbo vakuvereye Yeye Kuvaniinge shoonga tawo kwa kyeeri kya vayo.

²⁸Varorwaa wo kindo kyoose kilya kuvaniinga. Kwatarammbwa woko vakawuura nisha.

²⁹Kwavasuruma kisangu, vakairyaa. Kwauta-u mumuyo wafo, vakafwa Na iwuya kiluulyiny kundo valeuka.

³⁰Kwavaivya mumuyo wafo, vakawuywa muu lyingyi, Yewe kwaniingya ulana fwana shiiya.

³¹Nnganu wa Nndumi Iruva ukae-u llung'anu! Nndumi Iruva nafurye mashora akwe!

³²Mmbo alla ulana, lukarerema; Mmbo apaana mafumbu akauta nsu.

³³Mmbo shishiimbya Nndumi Iruva kyeeri shiifo na muu. Mmbo nshaarafumaa Iruva wakwa kyeeri kyoose kya muu wakwa!

³⁴Ikusaro lyakwa lyikusennye Yewe Nndumi Iruvafirye, Mashika ifura lyakwa ni kwafo shishelyiwonisaa.

³⁵Vallyaamari varumatwe kunu urukeny; Veetana maravi vakee fo lyingyiny-fo! Ee-da, nrima wakwa arafuma Nndumi Iruva!