Read BIBILLYA Mareiyo Meele a Iruva SABURI 106 Bible Online

SABURI 106 - BIBILLYA Mareiyo Meele a Iruva bible

SABURI 106

¹Haleluya! Aniny Nndumi Iruva kimaruma we ni mfoo! Mashika ilyillya lyakwe ni lya llung'anu.

²Mmbi ashiidimaa kya mashora maniini a Nndumi Iruva? Na yaamba nnduma wakwe moose?

³Ngoma yewo vatana dede yakwe Na itana fya usumanu mikonu myoose.

⁴Woi Nndumi Iruva, kushikummbwe, kyeeri kukeeilyillya vandu vafo; Kusheekye meendi kukeeivakyira.

⁵Naambo shilollye mbora ya vasauwe vafo, Shiidimi yaakana ifura lya vandu vafo; Shikurumishe shimuni amwi na vandu vafo.

⁶Mmbo lulekullyamarya amwi na vande veru. Lluletana maravi, ee lluletana makasha!

⁷Vande veru kulya Misri Mmbalekusara mashora afo a wende-fo. Nta mmbalekummbwa ilyillya lyafo iingyi-fo. Vakalyang'aa alya yeeveny, yeeve lya Shamu.

⁸Indi kavakyira kimaruma kya irina lyakwe, Kavaora mashora akwe maniini.

⁹Kakyeemya yeeve ilya ya Shamu ikaumya. Kavaita yeeve sha uruka wuumu.

¹⁰Kavaturunya wokony lwa valya evasuuye Na ivakyiraa wokony lwa vakyiduva vawo.

¹¹Mura ukammila vakyiduva vawo; Nnyalesaa-u nta umwi waawo-fo.

¹²Llo valekusirya marero afo. Vakeemba nnduma wafo.

¹³Uviny-da vakarekywa mashora akwa! Vakara ilatya ivavaso lyakwe!

¹⁴Vakavika nnu shoonga mbee kulya nng'alo, Kutani vaata Iruva kyeesony kulya kasa koomu.

¹⁵Nndumi Iruva kavaniinga ekyo veekundye, Llyo kavika ndwari shiroo nnang'ani yaawo.

¹⁶Vakatirya Mose kyififi kulya ulaleny, Na Aron mweele wa Nndumi Iruva.

¹⁷Llo sumbai ikavauka ikamira Datani; Na irika Abiram na vandu vakwe woose.

¹⁸Muro ukaaka yoo ikwaanuny lyawo; Sise ta muro tikarumata valya vakasha.

¹⁹Vakasongosya ifwanu lya ngashe wa saabu kulya Horebu, Vakainndya ifwanu elyo lya saabu.

²⁰Vakaalasha weele lwa Iruva, Kwa ifwanu lya ng'umbe ilyee mare.

²¹Vakarekywa Iruva, Nkira waawo, Yeto aletana finiini kulya Misri

²²Mashora a wende kulya urukeny lwa Hamu, Findo fya wende alya yeeveny ya Shamu.

²³Kaamba mmbo avamamitaa kuuta llya Mose alemoolokya. Kasira unyaasi lwa Iruva nalavamamite.

²⁴Vakateenda uruka llwa usha lusenyi-dwa, Nta mmbalekusirya kyaasa kya Iruva-fo.

²⁵Vakakunung'una efo yeemyeny, Na unyanga lwa Nndumi Iruva.

²⁶Naasa Iruva kaorwa woko lwakwe, kalya mboo Sheelyi mmbo avarumatyaa kulya ng'alo,

²⁷kanyanyata ngyeeri tawo efo vanduny va masanga, Nawo kavararata ngyurukeny tingyi.

²⁸Naasa vakakulunga iindya Baali kulya Peori; Vakalya firaso fya varumu.

²⁹Mashora awo akaenngye Nndumi Iruva kasswa, Ndwari shiroo ikavasheya

³⁰Llo Finehasi alesalala kafywerisa, Naasa ndwari ilya ikamanda.

³¹Mbony yei ikava ikumbuwaa kwa wiindi lwakwe Uka kyeeri ekyo na fyeeri fyoose.

³²Mmbo valeengye Iruva unyafi alya mureny wa Meriba, Mose karooyo nngoo kyimaruma kyawo.

³³Mashika mmbo valevavisa nrima wa Mose, Kumande arera marero wore akusara mbele.

³⁴Mmbalewaa vandu va masanga engyi-fo, Shaasa Nndumi Iruva evavavasya.

³⁵Indi mmbo valesasanga na vandu va masanga Vakakulosha mashora awo.

³⁶Vakainndya mafwanu a maruva awo, Mafwanu yoo akava nreiyo wawo.

³⁷Ee-da, mmbo valeniingya vana wawo va kyuumi na va kyika Vakarosywa kwa mmbishwa.

³⁸Vakairita samu ilatiri mbese, Samu ya vana vawo va kyuumi na va kyika

³⁹Ni indo valetefuwa ni mashora awo, Vakava vatuusi mbee ya Iruva wawo.

⁴⁰Nndumi Iruva karwaywa nngoo uwe ya vandu vakwe, Nndumi Iruva kasswa ding'u yakwe.

⁴¹Kavarambikya maakony a vandu va masanga, Na valya vevasuuye vakavashillya.

⁴²Vakasisywa mmbakyiduva vawo Vakavaalwa mashinga awo.

⁴³Keengyi Iruva aletirisha vandu vakwe, Indi wo vakankapa mungo velatyaa nsia wawo. Vakaengera irekya uraviny lwawo.

⁴⁴Naakwa ni indo Iruva alelollya makiva awo Elyi aleeta kiiyo kyawo.

⁴⁵Kakummbwa mma yakwe, Kavakyiiya kwa ilyillya lyakwe iingyi,

⁴⁶Kavawonisya ikyiiywa Ni vandu valya woose vevakamara mifungwa.

⁴⁷Woi Nndumi Iruva, Nndumi weeru kulukyire, Kulusanyirye, kuluute efo kwa vandu va masanga Lwaani irina lyafo yeele, lukapye ndoro nnduma wafo.

⁴⁸Naarafumwa Nndumi Iruva, Iruva wa Israeli, Pookya llung'anu na llung'anu, Vandu woose waambe, “Amin!” Haleluya!