Read BIBILLYA Mareiyo Meele a Iruva SABURI 139 Bible Online

SABURI 139 - BIBILLYA Mareiyo Meele a Iruva bible

SABURI 139

¹Mmbo kwasheesa na ishimanya Woi Nndumi Iruva

²Kwavemanya kwakooya shikee rembo ao sheenda. Kwavemanya makusaro akwa kwiikee kwaasha.

³Mmbo kwasalallya ikuboo lyakwa na ilala lyakwa Kwavemanya na mikaaye yakwa myoose.

⁴Mashika nkwiifo nta irero lyimwi ulumyi lwakwa Kulalyiishi-fo Nndumi Iruva.

⁵Mmbo kushiringitye mbee-na numa. Kwashivikyau woko lwafo.

⁶Ekyo kyoose kwashitannya urango lwakwa mmbo lwalemwa imanya, Mfivaa yeesa-fo, nta nshififikyaa-fo!

⁷A sheende kwi shire shilekwaanannya neewe! Sheende kwi shire shilakulollya!

⁸Kwe sheesamaa iruveeu, Yewe mfo kukai; Shaamba niisamya si kwa vafu, Yewe mfo kukai.

⁹Kwe sheekuboo ngama shirumbuke fika mbai deny ya nruva

¹⁰Naako ni efo woko lwafo mmbo lweeshikooyaa-fo, Nalo woko lwafo usha mmbo lushitiraa.

¹¹Naakwa shaamba, Ireema lyisheshisikyaa Na kukooue sa yeevaa ireema lya kio,

¹²Ate naako ni ireema llyikusurumaa kindo-fo. Mashika kwafo yewe kio nkimwi sha nsanyiny. Ireema na sa kwafo yewe nkimwi nsi.

¹³Mashika ni yewe kuleshuumba kwashaambika malungo moose Kwashaambika malungo moose nta kulaore shilendeirwa mma

¹⁴Mmbo nshekwaanaa elyi shileumbwa indo! Na shia ya wende yeeresye. Mashora afo mmaniini, Neeny shamanya na nshushwa.

¹⁵Nta maffwa akwa nnyakusurumyi kwafo-fo, Na kyeeri shekeeyuumbwa yewe mbo kweiishi deny.

¹⁶Shilandeuke-fo kindo miso mmbo afo mmbo eeshilollye. Na kyakwa kikareiyo efo kitamuny kyafo Nta mikonu ya yiirwa lyakwa ilandeambawa.

¹⁷Makusaro afo atiri itumbe kwakwa, woi Iruva wakwa! Shaasa ang'ani nnu!

¹⁸Sheekena makusaro afo mmbo ailanyi nsanga; Shikwiiboo mmbo shikeekusara kyafo tupu!

¹⁹Kwee kweemamita varavi, woi Nndumi Iruva! Yeni veewaa, ukeny kwakwa!

²⁰Vakiduva vafo mmbo vekusenda ruu vakakulyamarya.

²¹A Nndumi Iruva kivaa kure kulasua yewo vakusuuye?

²²Yeny mmbo shivasuuye nnu deny, Vakava vakiduva vakwa.

²³Woi Iruva mbee, sheesa kumanyi nrima wakwa; Shisununda kumanyi makusaro akwa.

²⁴Kulole kwakooya kwiifo shia isheendee ikurya nnang'ani yakwa, Kushiteterye shieny ya llung'anu.