Read BIBILLYA Mareiyo Meele a Iruva SABURI 145 Bible Online

SABURI 145 - BIBILLYA Mareiyo Meele a Iruva bible

SABURI 145

¹Woi Iruva vakwa, mangyi nshekunganisaa, Shiitikise irina lyafo llung'anu na llung'anu.

²Mmbo nshekwiitikisaa wo nkonu, Shirumishe irina lyafo llung'anu na llung'anu.

³Nndumi Iruva ni nniini wa yiitikiswa nnu! Nta shaasa ang'ani nkivaa imanyika-fo!

⁴Marika moose mmbo asheetikisaa kya mashorakwe. Ashevambisa mbony ta mashora afo maniini.

⁵Shikusare kya usha lwa itumbe lwafo na usha lwa vayo Na kya mashora afo moose maniini.

⁶Vandu va masanga vashereraa kya mashora afo shaasa eereye; Neeny shaambe nnduma wafo.

⁷Mmbo vashevambisaa veekumbwaa usha lwafo lwiilanyi; Veembe mbony ta usumanu lwafo.

⁸Nndumi Iruva mmwilyillya kaveva mwiisarya deny, Nshi mwaangu irooywa ni unyafi-fo, ilyillya lyakwe ni yiingyi.

⁹Nndumi Iruva mmbo akee nsha kwa woose. Na isarya lyakwe lyikakooya fyuumbe fyoose.

¹⁰Woi Nndumi fyeembe fyoose fishekwaana, Neewo veekwiindya vashekunganisa.

¹¹Vashevambisaa mbony ta itumbe lya ushilyi lwafo; Vaveviana mbony ta wiidimi lwafo.

¹²Naambo vamanyisye vandu mbony ta mashora afo maniini, Na itumbe lya uniini lwa ushilyi lwafo.

¹³Umangyi lwafo ni umangyi lwa meeri moose, Na ushilyi lwafo ni lwa marika moose.

¹⁴Nndumi Iruva mmbo asaleesa yewo woose vawa Kaipoo woose yewo vakee ngatareny.

¹⁵Miso a vandu woose akeekulola Yewe; Neewe kwavasimba shoonga tawo kyeeri ekyo kisumani.

¹⁶Kwatarambwa woko lwafo, Yefyo fitiri muu kwafiwutisa efyo fivatinnyi.

¹⁷Nndumi Iruva mmbo akee wa usumanu efo mashoreny akwe moose; Kaveva mwiilyillya fyuumbe fyakwa fyoose.

¹⁸Yewo vembaanga Nndumi Iruva kakaa kufii nawo, Mmbo yewo vambaanga na nsia.

¹⁹Yewo veemwiinndya mmbo asheinutyaa ivatannya fya usha, Naarannye kyeerero kyawo navaauwe.

²⁰Nndumi Iruva mmbo aringa yewo woose vankunndye, Neewo valakee va usumanu mmbo ashevamamitaa,

²¹Kana kyakwa mmbo kasheambaa nnduma wa Nndumi Iruva, Fyoose fikee na muu fing'anise irina lyakwe yeele llung'anu na llung'anu.