Read BIBILLYA Mareiyo Meele a Iruva SABURI 22 Bible Online

SABURI 22 - BIBILLYA Mareiyo Meele a Iruva bible

SABURI 22

¹Iruva wakwa, Iruva wakwa, Nkyiki elyi kwashira? A nkyiki elyi kwakaa kwaasha kulakunde isheekya? Kwaasha nnu na kiyyo kyakwa?

²Iruva Nndumi wakwa! Shikefiira nsanyiny Indi nkukeyaarannya-fo. Shikekapa kyoorongye kio, Nta shilakooye yaanguywa.

³Yewe mmbwe mweele Kwaiindywa mmbandu va Israeli

⁴Vakuu veru vakakuvika nsia, Vakakuvika nsia na yewe kwavakira.

⁵Vakakufuuya ukyiveny na yewe kwavatarama, Vakusora nawo mmbalesuka-fo.

⁶Indi yeny mmbo shikee ikuru Nta nshi nndu-fo, Shateendwa na iipalwa ni wo nndu.

⁷Woose vekeeshilola vakashiseka, Vakashisela veering'isaa mirwe yavo.

⁸Vakaamba, Nshi we kwemmbikyensia Iruva Nndumi? Nkyiki elyi alakukyiraany? Kwakooya asennyo kyafo, Naasany nakukyire.

⁹Indi yewe, Woi Iruva Nndumi, Ni yewe kuleshuuta nsangeny wa maye wakwa, Na ishiringa kyeeri shekee mwana n-du.

¹⁰Mmbo shilekuvika nsia kupookya mawonikyony akwa, Kupookya llya shewonika yewe Iruva wakwa.

¹¹Kulakae kwaasha na yeny-fo, Mashika ukiva lwanserikya, Kuve kufii na yeny, Mashika elyi kulaiyo nndu wa isheekya.

¹²Vakiduva veengyi, Vashisengetya sha nguleta Vakashisisira sha nguleta titiri finya ta Bashani!

¹³Vakatarammbwa kana sha miiso, Ikunndye iaratwa-ratwa.

¹⁴Shammisya sha mura wapusuka, Mafwa akwa moose akateruka; Nrima wakwa ukava sha muya weeka.

¹⁵Uroo lwakwa lwammuuma shawoyo Ulumi lwakwa lukasangya na yuundu. Kwanshira shifiiye kilulyiny.

¹⁶Vaala shia vanshisengetya; Vakashilyingya sha fite, Vakashidosha maako na marende.

¹⁷Vakashira shikee mafwa, Vakiduva vakwa vakashilla na ishiteenda.

¹⁸Vakakwaavya sori takwa, Na isaralyakwa vakalyikapya kura.

¹⁹Woi Nndumi Iruva, kulasalale kwaasha na yeny. Yewe mmwekyi wakwa, Osho sway kusheekye.

²⁰Shikira muu wakwa Kushiite kwaasha na fite efyi!

²¹Shuuta efo kaniny ka miiso, Shitarama kwashuuta efo mbembeny ta mmboo-eti.

²²Shavia vanavama kya mirundye yafo; Shikurumishaa efo mwinindye wa siri yafo;

²³Nrumisheny, eni varundi va Nndumi Iruva. Yeni va mmba ya Yakobo, mwiindyeny Arafuminy Iruva. Mwiindyeny yeni vandu woose va Israeli.

²⁴Mashika we nnashiila unana lwa ngwera-fo, Nta ukiva lwawo-fo; We mmbo aarannya fiterewo Kavevarouwa swany.

²⁵Ni yewe Iruva kwashiidimisya, Shakurumisha nnang'ani a vandu; Nshiindyaa kyaasa kyakwa, Mbee ya valya vakwiindyaa;

²⁶Valatiri mmbo valyaa valemwa Neewo vakuruuya Iruva-mwitorya mmbo vamwiindya Na ivikywa mbora llung'anu!

²⁷Mmbo masanga moose ankummbwaa Na iwuiya Iruva-mwitorya, Mmba ta masanga moose vashemfirya-ndi.

²⁸Mashika Iruva Mwitorya ni mangyi, Nawe kashillya masanga moose.

²⁹Yewo vakee mbafu woose, Vashefiryaa ndi mbee yakwe Woose vatiri mwiili vashemwinndyaa.

³⁰Yewo vashaa numa vashendunndyaa Na mbony ta Nndumi tisheambawa mmbandu.

³¹Mitannyi yakwe ya ukiro isheambawa, Vandu valandewonike vashevywaa, Iruva mmbwe atanyi fyoose.