Read BIBILLYA Mareiyo Meele a Iruva SABURI 26 Bible Online

SABURI 26 - BIBILLYA Mareiyo Meele a Iruva bible

SABURI 26

¹Woi Nndumi Iruva, kushikapannye, Mashika nshitiri mbese-fo, Nshikuvikye nsia kuleefo nyinyira.

²Woi Nndummi Iruva shisuma kushimanyi, Kulle nrima wakwa na makusaro akwa.

³Ikunda lyafo lyikeshoora, Sharunda kikwaani na udede lwafo.

⁴Nshikaa rembo na vandu varavi-fo, Nta shilakaa na vakunangari.

⁵Shisuuye isanga amwi na varavi, Naakwa ni yewo veesoka.

⁶Woi Nndumi Iruva mmbo shasangya maako akwa, Kya yoora sheelyi nshitiri ivara-fo, Shakulunga na valya veanga mwiindyeny, Sharingitya mesa afo.

⁷Shishiimba kiimbo kya ikwaarafuma, Na yaamba mitannyi yafo ya wende.

⁸Nndumi Iruva ni efo kwafo shikundye, Ando usuri lwafo usha lukai.

⁹Kulashisande amwi na valyamari, Nta isheshaanta amwi na yewo vewaa.

¹⁰Vandu vetana fivishwa kyeeri kyoose, Wo nkonu vakava veelya fya ntambo.

¹¹Indi yeny mmbo shitanaa fya usumanu, Kushisarye na ishikira.

¹²Kwakooya shakaa-fo shitiri finya, Mmbo shirumishaa Nndumi Iruva, Nnangani ya ikwaanu lya siri ya Nndumi.