Read BIBILLYA Mareiyo Meele a Iruva SABURI 34 Bible Online

SABURI 34 - BIBILLYA Mareiyo Meele a Iruva bible

SABURI 34

¹Mmbo shirumishaa Nndumi Iruva kyeeri kyoose. Kyeeri kyoose mmbo shishaamba usha lwakwe.

²Mmbo nshiitikisaa Nndumi Iruva; Na woose vakewonnyo veete vafure.

³Rumisheny Nndumi Iruva lusasangyi amwi; Loose lusange amwi luitikise irina lyakwe.

⁴Shiletereva Ndumi Iruva, nawe kashaarannya, Kashuuta werei lwakwa loose.

⁵Alukkyeny Iruva, mukooye ifura; Tusu, mmukooya isuka-fo.

⁶Nndu nkiva alefuuya Nndumi Iruva, nawe kamwiirikya, Nalyo kantarama makiva akwe moose.

⁷Woose vamwiindya vakaringwa ni vasu va Nndumi Iruva, Na ikirwa efo nrengeny.

⁸Manyiny muveni ndesa Nndumi Iruva akee nsha. Ngoma ewo verishya ukiro kwakwe!

⁹Indyeny Nndumi Iruva eni vandu vakwe; Na ewo vemwiindya kavawonisya fya muu wawo.

¹⁰Nakwaa ni miiso tifulukywaa na itirwa nshaa, Indi ewo veindya Iruva vatiri wo kindo.

¹¹Oshony, yeni vakoo, musheshaarannya, Na yeny shimuloshe iindya Nndumi Iruva.

¹²A ndesa kukundye mikaaye ya ifura, Kukundye mbora na muu mwaasha?

¹³Naasany ra itana makasha! Nta yaamba wongo!

¹⁴Lakana na makasha kuruye mesha. Lalakya na iruuya ufoo.

¹⁵Nndumi Iruva mmbo alolaa vandu vasaari; Na yaarannya fiiyo fwawo.

¹⁶Indi veetana makasha kavakapa mungo; Kavauta yaa ulaniny nta valakikumbuwaa-se.

¹⁷Vandu vasaari wo vakafuuya Nndumi Iruva. Mmbo avaarannya, Na ivatarama makiva awo moose.

¹⁸Nndumi Iruva akee kufii; Na valya vafiiye nrima Kakyira na valya vemme yuuta-pa.

¹⁹Maataro a nndu nsaari ni meengyi, Indi Nndumi Iruva we kankapannya.

²⁰Nndu nsaari mmbo aringwaa ni Iruva Kulaifo nta iffwa lyakwe lyimwi lyifishwaa!

²¹Ukasha mmbo lurumataa vandu vakasha, Na ewo vasuuye vandu vasaari vashekapwaa.

²²Nndumi Iruva ashekiraa vandu vakwe, na ewo vekenrishya mmbashekapwa-fo.