Read BIBILLYA Mareiyo Meele a Iruva SABURI 39 Bible Online

SABURI 39 - BIBILLYA Mareiyo Meele a Iruva bible

SABURI 39

¹Shilaamba, “Mmbo shiringa muu wakwa Shilashetana ulyamari nnang'ani yakwa. Naakwa shalollya yewo vetana makasha, Vekee kufii na yeny nshishambaa kindo-fo.”

²Mmbo shilemlalya sau Shilaambe kindo Indi ukiva na mavavyo akwa akeendereka,

³nrima wakwa ukarovyo mfyoova, Ndesa shileengera ikusara, Ni indo shilekooya yaatarika, Mafurumyony sharera indi,

⁴“Woi Nndumi Iruva, Ufishyony lwakwa ni indii, Ni mikonu yiinga isae-u. Shimanyisya fyeeri fya muu wakwa:

⁵Ate fyeeri fya muu wakwa ni fyaangu deny. Muu wakwa nshi kindo mbee yafo-fo. Ee, wo nndu ni sha kirishe nsi.”

⁶Kya dede wo nndu mmbo akeeira veru sha kirishe, Yaatarika lyakwe lyoose lya nruu. Mmbo akesangirya umasi nalaishi muni.

⁷Ale Nndumi, ulaalu nkyoki shikevereya? Ni kwafo yewe shivikye nsia.

⁸Kushuute efo ulyamariny lwakwa loose, Kulairilye shisekwa mmatondo.

⁹Shammalallya nshikyaamba kindo lyingyi-fo. Kimmba ni yewe kuletana indo.

¹⁰Kulakishikape lyingyi-fo! Ngapo tafo tikeshivavisa,

¹¹Elyi kwakapa nndullyamari na insakira, Kwalyamara usha lwakwe sha kiseso, Kya dede, wo nndu ni sha mumuyo tupu!

¹²Arannya kiterewo kyakwa, woi Iruva! Kwaarannye kiiyo kyakwa! Elyi shifua kulamalallye sau, Mashika yeny nsha mwiny-da akeiira, Ni nndu wa kyaaro kyimwi sha vakuu vakwa woose.

¹³Shilekeya shikooye ifura Kulare shansama ulana na irumaka deny.