Read BIBILLYA Mareiyo Meele a Iruva SABURI 40 Bible Online

SABURI 40 - BIBILLYA Mareiyo Meele a Iruva bible

SABURI 40

¹Shilevereya Nndumi Iruva shiisisiryaa Kashaarannya na ishirouwa kiiyo kyakwa.

²Kashuuta efo irininy lyiretaa muu, Efo ishombony lya mapwashi. Kashivika andu kusha uwe ya isimamba Na ishikira muu wakwa.

³Kashilosha kiimbo kiiya, Kyiimbo kya irumisha Iruva weeru. Ni veengyi valollya na yeereya Numa vashekunanavye kwa Nndumi-Iruva.

⁴Ngoma nndu akunanavye kwa Nndumi-Iruva Nndu akulungaa na vandu vekushika. Ewo vashiindya maruva a wongo.

⁵Ee, Nndumi-Iruva, Iruva wakwa, Mmbo kulutannyi findo fiingyi fya wende, Mirunndye yafo uwe yeeru ilavaa yeekyena. Kuleefo nndu moose akuvakye yewe. Kukooye sheshidimaa yaamba efyo fyoose, Sheshidima imanya yekyena lyavavyo-fo.

⁶Nkukundye kiraso nta kyaanu-fo. Nkukundye kyaanu kya imamita-fo, nta kyeyuuta ulyamari-fo Indi mmbo kushiniingye maarwi shikwaarannyi.

⁷Llyo shaamba: “Nnyaankai ee Iruva wakwa, Shitani ndesa kukundye Ndesa kikee kireiye kyakwa efo kyitabuny kya uvavaso.

⁸Uramba lwafo shilukunndye, Na ilutira na nrima moose.”

⁹Efo usanguny lwa vandu veengyi Shilerera mbony shisha ta ukiro. Ee Nndumi-Iruva kuveshi Sheelyi nshilemalallya nta kidu-fo,

¹⁰Nshilesuruma mbony yei nriminy wakwa-fo. Sheeli ni yewe mwikira wakwa. Nkonu simu sharumisha udede lwafo na weekyi lwafo. Udede na usaari lwafo shalwaamba paa nnang'ani ya vandu.

¹¹Woi Nndumi Iruva, kulashiimi isarya lyafo, Usaari na udede lwafo fyoose fishiniinge ufoo na uleke.

¹²Ngapo tilavaa yekyena tikashiringitya, Shafotwa ni makasha akwa Nta shilaidimi ilola! Mmengyi akailannya fii ta nrwe wakwa, Na yeny shavefwa nrima.

¹³Kunda ishikira woi Nndumi-Iruva! Osho ulaalu, kusheekye woi Nndumi-Iruva,

¹⁴Woose vakunndye ishirumata Valemwa woose na ifulunkywa. Ewo vakefurya ukiva lwakwa Woose vasuke na ilemwa.

¹⁵Ewo veshiteenda, “Vasuke kya ilemwa lyawo.”

¹⁶Indi yewo vakuruuya yewe Verumisha na ikushwela, Valya vakunndye ukiro luuka kwafo, Llunganu vaambe: “Mmbi sha Nndumi Iruva!”

¹⁷Woi Iruva yeny ni nturi mfwafwa na nturi, Indi yewe nkuleshirekyo-fo. Yewe ni mwikira na mweekyi wakwa. Kulakyeeyo osho woi Iruva wakwa.