Read BIBILLYA Mareiyo Meele a Iruva SABURI 44 Bible Online

SABURI 44 - BIBILLYA Mareiyo Meele a Iruva bible

SABURI 44

¹Ee Iruva, lwammiita na maarwi eru, Vamiku veru veluvia Mitannye kuletana fyeeri fyawo, Mikonu miingyi ilemmira:

²Yewe kumuni na woko lwafo Mmbo kwaanta vandu va masanga; Ando kwawo kwavika-fo vandu vafo kwakapa vandu va masanga engyi, Na vandu vafo kwavaidimisya.

³Vandu vafo nshiwo valevinga-fo; Nta nshi finya tawo veni tilevaidimisya-fo. Indi ni yewe kulevakira na woko lwafo; Kwa vaidimisya kimmba elyi kuvakunndye.

⁴Ewe mmbwe mangyi na Iruva wakwa. Kuleidimisya vandu vafo vakavinga.

⁵Kwa finya yafo luvavingaa, Kwa irina lyafo luvavavaraa.

⁶Mashika ura lwakwa nshiluvikye nsia-fo Nta upanga lwakwa llushikiraa-fo.

⁷Indi yewe mmbwe kulelukira vetuuro veru; Na valya valusuuye kwavasuta.

⁸Lukarumisha Iruva weeru nkonu piti Na irina lyafo lyisheindyo llung'anu.

⁹Indi ulaalu kwanlura lukakapwa. Nta nkukyikee kufii na matorito yeeru-fo.

¹⁰Lukakapwa mmbakiduva veru Vakakurika mifungwa masaa eru.

¹¹Kwalura lukashishwa sha moonri; Kwalunyanyata nnang'ani a masanga.

¹²Kwakumba vandu vafo kwa wuuru udu. Kulawone-fo nta mbusha shidu.

¹³Efyo kulelutannya fikalollyo mmbandu. Nawo vakalumina na iluseka.

¹⁴Lukateendwa ni masanga kyeendwa ni yewe; Vakarunguta mirwe yaawo vakalwiila.

¹⁵Shasuka nkonu piti; Na ilollya usutu mbee ya vandu.

¹⁶Kwa firumu na kiila. Kya vakiduva ewo vashisuuye.

¹⁷Efi fyoose fileutika kweru. Lyo nta nlulekurekyo-fo, Nta ifisha mma yeeru nay ewe-fo.

¹⁸Nlulekura nta yaalashika-fo. Nta nlulekumina ao ikura-fo.

¹⁹Naakwa ni elyi kulelura nnang'ani a mafisi. Kwalura efo ireeminy lya makimima.

²⁰Kukooye lulenra ikwiinndya yewe Iruva weeru Lukaindya maruva engyi a wongo,

²¹Ni kya dede nkuti kwemanyaa, Mashika makusaro moose a kirika mmbo kuaishi.

²²Kimaruma kyafo yewe mmbo lukewaawa; Lukatannyo sha moonri akeendeshishwa.

²³Kwiipo Nndumi Iruva nkikyi elyi kwalala? Salala kulashelura deny-fo.

²⁴Nkikyi elyi kwalusuruma usangu lwafo? Kwarekyo mavavyo na makiva eru?

²⁵Mmbo lukevakape kikailannya, Lukawa-si lulashiidima isalala.

²⁶Kwipoo kwalweekya! Kimaruma kya elyi kulukunndye.