Read BIBILLYA Mareiyo Meele a Iruva SABURI 50 Bible Online

SABURI 50 - BIBILLYA Mareiyo Meele a Iruva bible

SABURI 50

¹Nndumi Iruva, Iruva muni finya, arera kavaanga ulana loose; Kupookya taari ya ngama kafurumya na taari ya nkwaany!

²Uka Sioni, nsha nnu muri, Iruva mmbo eefo amikaa.

³Iruva weeru asheshaa nta nshi kwakirika-fo. Mbee yakwe muro ushemamitaa, Na uraato uniini nnu lusheiraa lushenringityaa taari toose.

⁴Ashevaanga ngina efo uuwe amwi na ulana valollye, Erumbuyaa vandu vakwe myaandu yaawo:

⁵Eshambaa, “Umbyeny vandu vakwa, Valya valellya mma na yeny.”

⁶Na ngina tishekureekya udede lwakwe, Mashika Iruva mmbwe mwileta mwaandu.

⁷“Iteny eni vandu vakwa na yeny shireraa, Yeny shikukureekya Israeli; Yeny mmbwe Iruva shikee Iruva, Iruva wafo!

⁸Shikusakira kimaruma kya ulyamari lwafo-fo Firaso fyafo mmbo fikee mbee yakwa fyeeri fyoose.

⁹Nshiwarya ng'umbe yuuka mmba kwafo-fo, Nta ndafu yuuka usirony lwafo-fo.

¹⁰Mashika mafisi a ngoroshyony moose ni akwa, Na ng'umbe shoose uwe ya mafumbu kyiku.

¹¹Ndeye ta nginii-u shoose shitiishi Na mafisi moose a mareminy ni akwa.

¹²Kwakooya shetirwa nshaa, nshekuviaa-fo, Mashika ulana na fyoose fiifo ni fyakwa.

¹³Ndesa shalya nyama ya ngoleta, Ao shana samu ya ndafu?

¹⁴Niinga Iruva kiraso kya imwarafuma, Niingya kweendya kyaasa kilya kulevika.

¹⁵Shivaanga kyeeri kya ukyiva, Shikukiraa, na yewe kushirumishaa.”

¹⁶Indi nndu alakee wa usumanu, Iruva ambyaa: “Mmbo kutiri usumanu-kyi lwerera usuri lwakwa, Ao lwekummbwa mma yakwa kaniny kyafo.

¹⁷Mashika yewe kusuuye wikimbi, Na marero akwa kweera na numa.

¹⁸Kwalollya inyinyi kwatira mbuya nalyo, Kwalya na veetusa.

¹⁹Kana kyafo kakarera makasha, Na ulumi lwafo lukalasya fya ntambo.

²⁰Kwakaa rembo kwiireraa mwanamau, Na infingya findo fya wongo.

²¹Ni indo kuletana na yeny shamalallya, Kwakusara yeny mmbo shikee sha yewe, Indi ulaalu shikuikimbaa, Shikoore na yewe kulollya paa.

²²Manyiny ndesa shamuvia eni mulakumbuye Iruva, Shilashemurandwa-randwa Mulalollya nndu wa imukira.

²³Yeto ashaana na kyaanu kyakwe we mmbwe ashiindya, Nndu moose asalala efo usumanuny lwakwa yeto mmbwe shishenkiraa.”