Read BIBILLYA Mareiyo Meele a Iruva SABURI 52 Bible Online

SABURI 52 - BIBILLYA Mareiyo Meele a Iruva bible

SABURI 52

¹A nkyiki elyi kukushobya ukasha yewe nndu mbafu, Uwe ya veiindya Iruva?

²Kyeeri kyoose mmbo kukekusara itana ulyamari, Ulumi lwafo lukavaka weembe; Kwava nndu wa mbony ta ntambo.

³Kwalanga makasha ngota mesha Yaamba wongo ngota udede.

⁴Kwakunda marero yoo moose efuluta vandu Yewe nndu wa mitambo!

⁵Indi Iruva ashekurumata llung'anu. Akweere kundo kwaasha kulalollyo, Nakuute deny kunu urukeny Lwa vandu ewo veefo na muu.

⁶Vandu va usumanu vashelollyaa, Vatirwa ni usau na inseka.

⁷“Ate yeu mmbwe nndu ulya Alavikye Iruva nsia, Mmbwe avikye nsia efo umasiny lwakwe, Kakwaallwa nndu mbafu kyeeri kyoose.”

⁸Indi yeny shavaka nri Ukee mmbaaye efo mmba ya Iruva. Efo kwa Iruva mfo kundo Shivikye nsia llung'anu na llung'anu.

⁹Mmbo shishekwaana llung'anu, Kimmba ni yewe kuletana. Shivereye irina lyafo kimmba lyikee isha Efo nnang'ani ya vandu vafo woose.