Read BIBILLYA Mareiyo Meele a Iruva SABURI 68 Bible Online

SABURI 68 - BIBILLYA Mareiyo Meele a Iruva bible

SABURI 68

¹Iruva asalala, na vakiduva vakwe vanyanyaka. Valya vansuuye woose vanyanyake.

²Ngata nsu wavivitwa ni uraato. Niindo akeevavivita. Ngata muuya weeka mbee ya muro Niindo veetana ulyamari vakeemamika woose mbee ya Iruva.

³Indi yewo va usumanu mmbo vashefuraa elyi Iruva asheshaa; Mmbo vakesaa na yiimba veefuraa.

⁴Imbyeny Iruva, rumisheny irina lyakwe; Songosiyeny shia yakwe yeto mwiisaama mafishi; We mmbwe Nndumi Iruva fureny mbee yakwe.

⁵Nde wa vana va ngwera mwiiringa vaka va dingu Ni Iruva akee efo mmba yakwe sheele.

⁶Iruva kaniinga vaturi ando kwekaa; Yewo vakee vafinge kavaporomwa, Indi yewo valyang'a mmbo vasheerwa kasa koomu.

⁷Ee Iruva kasongoya vandu vafo, Kwaveeta kulya nng'alo,

⁸Kidina-si kyikasha, yewe Sinai na nginii-u ikapuswa mmbwa, Llya kweiyo yewe Iruva, Iruva wa Israeli.

⁹Kwaveengye mmbwa, Mmbwa ya mwiina ikaniisa uruka na sumbai ikarelela.

¹⁰Vandu vafo vakawona kundo kwekaa; Kwelyillya lyafo kwavaniinga kundo kwawo kwekaa.

¹¹Nndumi kavika ishingo, Na vaka vakavafitya mbony.

¹²Vamangyi va matorito vakarisha mwaala, Vaka kulya kyeny vakakwaavya mifungwa.

¹³Lla neelyi valesaa efo ulaleny lwa moonri, Mafwanu a mbita na mawe a fesa, Na maaru awo amikaa sha saabu shisha.

¹⁴Kyeeri Iruva muni finya alevanyanyatya kwaasha Mbyo ikooloka ifumbuu lya Salmoni.

¹⁵Yewe ifumbuu, ifumbuu lya Bashani; Yewe ifumbuu lya fidoro fiingyi ifumbuu lya Bashani.

¹⁶A kyikyi elyi kwatirwa nkyififi, Ifumbuu Iruva alelyisauwa ekee uwe ya-vayo? Nndumi Iruva mfo kundo ashekaa llung'anu.

¹⁷Aryani na mamwiingyi wa vandu, Fiku na mafiku a mitika ashoomwaa, Ni Nndumi akeesha kyeny kwakwe kweele ooka Sinai.

¹⁸Mmbo akeesaama uwe ifumbuu, eerye mifungwa, Neewarya findo fya pya fyuuka kwa vandu vafungwa sanda neewo valyang'a. Naasa Nndumi Iruva andekaa-fo.

¹⁹Nndumi Iruva narumishwa! Iruva mmbwe mweekyi weeru Mmbwe mwiikira weeru.

²⁰Iruva weeru mmbwe Iruva wa ukiro lweru! We akee Nndumi kalukira ufu.

²¹Iruva mmbo ashefishaa mirwe ya vakiduva vakwe; Yewo vakee valyang'a valakunndye yaalashika.

²²Nndumi Iruva mmbo aamba, “Mmbo shishevaviira vawuye wooka Bashani; Mmbo shivaviira wooka efo ndilyiny-si ya yeeve

²³kusangye marende afo efo samuny ya vakiduva vafo, Nafyo fite fyafo filye-fo imutu lyavayo.”

²⁴Yewe Iruva mamwingyi wa vandu na finya yaawo mmbo lulollywa, Mamwiingyi wa vandu va Iruva wakwa mangyi yakwa kundefika yoo kweele kwakwe!

²⁵Mbee yakwe, mmbo veefo veembi numa veekapa fivale; Nnang'ani veefina mbasa.

²⁶Rumisheny Iruva nnang'ani a vandu woose, Rumisheny Iruva eni vana va Israeli.

²⁷Kwiifo Benyamen, yeto n-du ya woose. Kalatya vasongoru va Yuda na ironda lyawo. Vakalatya vasongoru va Solomoni na vasongoru va Naftali.

²⁸Woi Iruva ora finya tafo ndesa ting'ani; Yeto kulerumata nato kyimaruma kyeru.

²⁹Wooka efo mmba yafo Yerusalemu Efo kundo vamangyi vashekweengye findo fya pya.

³⁰Kyeemya Israeli mafisi yoo akaa efo makongyen Na ikamba elyo lya shau na lya ngashe tavayo, Kutani vandu va masanga yoo vakwiindya na ikuutya usanu. Neewo veekunda myaandu kushevanyanyata.

³¹Vasongoru mmbo vasheshaa wooka Misri na Veesopia Veengye Iruva findo fya pya.

³²Eni mangyi ta ulana, imbyeny Iruva, Imbyeny nndumi fiimbo fya inndumisha.

³³Imbyeny yeto ashiiraa efo iruveeu, iruveeu ta elyo na elyo, Mwaarannyeny unyanga lwakwe lwa finya shiniini.

³⁴Inndyeny finya shiniini ya Iruva. Yeto mwiishillya Israeli kutani wiidimi lwakwe lwafika nginiiu.

³⁵Iruva mmbwa weeresi yoo kweele kwakwe, Ee, we mmbwe mangyi ya Israeli. Kaniinga vandu vakwe finya na wiidimi. Iruva narumishwa.