Read BIBILLYA Mareiyo Meele a Iruva SABURI 71 Bible Online

SABURI 71 - BIBILLYA Mareiyo Meele a Iruva bible

SABURI 71

¹Woi Nndumi Iruva, mmbo sharishya ikusuruma kwafo; Kulashire shikooye isuka.

²Yewe kukee wa usumanu shitarama kushikire. Kushilootye yaarwi lyafo neeshikira.

³Kuve mmbanga yakwa yeerishya, Na turuve yakwa yeshikira, Mashika yewe mmbwe mbanga na turuve yakwa.

⁴Woi Iruva wakwa, shikira kwashuuta efo maakony a vandu vakasha, Kushuute efo ngyaleny ta vaafinya na veewaa.

⁵Mashika yewe Nndumi, mmbwe shikuvikye nsia. Yewe Nndumi Iruva mmbwe shikuvikye nsia ukya shikee mwana nkoo.

⁶Shakuvika nsia ukya nkonu shewonika; Yewe mmbwe kushuutye nsangeny wa maye-akwa, Mmbo shikurumishaa mikonu myoose!

⁷Veengyi mmbo vakeshilola vakaereya, Indi yewe kwava turuve yakwa itiri finya.

⁸Kana kyakwa mmbo kyikeerumisha irina lyafo, Na itumbe lyafo nkonu piti.

⁹Kulashere sakyeny kyeeri kya ukuu lwakwa, Nta kulashitiiye kyeeri shatura finya.

¹⁰Mashika vakiduva vakwa mmbo vakeerera makasha uwe yakwa; Mmbo vakeevika kirisi, yewo vakunndye ishiwaa.

¹¹Mmbake yaamba, “Iruva alemmwisityo-u; Llatyeny mukandentira, Mashika nkwiifo mwinkira-fo!”

¹²Woi Iruva, kulakee kwaasha neeny-fo. Woi Iruva wakwa angusya naambo kukooye ishitarama.

¹³Vakiduva vakwa woose vasutwa na imamitwa, Yewo vakunndye ishaafinya vasuka na yiipalwa.

¹⁴Indi yeny mmbo nsheengera ikuvika nsia; Sheengere ikurumisha yewe kya mmwasi na mmwasi.

¹⁵Kana kyakwa mmbo kishaamba mitannyi yafo ya usumanu; Na mashora afo a ukiro nkonu piti, Naakwa ni efyo kutannyi fyammiilannya urango lwakwa.

¹⁶Kwa mitannyi ya Iruva itiri finya. Mmbo shishaa shaambe yewe mmbwe nsumanu-nsi.

¹⁷Ewe Iruva mmbwe kushiloshye ukya shikee n-du, Kweekyo mmbo nshaamba kya mashora afo maniini.

¹⁸Naakwa shakkwa na fii tikamya myaasa, Kulashire-fo Iruva wakwa kutani shavia ngyeeri ishaa numa finya yafo.

¹⁹Usumanu na finya tafo, ewe Iruva. Mmbo tisaamye tikafika iruveeu. A mmbi ungyi akuvakye yewe Iruva, Katana findo fing'ani indi.

²⁰Kwanshengye shalollya ngatara shiingyi shuumu, Indi kushiviirya muu lyingyi; Kushuuta efo sumbai ya uruka, kundesaamisa lyingyi uwe.

²¹Mmbo kusheshiindya Na ishiviirya muu lyingyi.

²²Mmbo shishekurumishaa na fivale, Kimaruma kya ilyillya lyafo yewe Iruva wakwa, Shishekwiimbya na sese yewe kukee mweele wa Israeli.

²³Kwa ifura lying'ani, Shikwiimbya yewe yeny na muu wakwa moose, Mmbo nshiimbaa mashika ni yewe kuleshikira.

²⁴Mmbo shireraa kya usumanu lwafo nkonu piti, Mashika valya veekunndye ishaafinya mmbo valesutwa na yiipalwa.