Read BIBILLYA Mareiyo Meele a Iruva SABURI 72 Bible Online

SABURI 72 - BIBILLYA Mareiyo Meele a Iruva bible

SABURI 72

¹Woi Iruva, idimisya mangyi alatye usumanu lwafo, Kunloshe itana efyo fikee fya dede.

²Ashillye vandu vafo ndesa kyikundikye, Yewo vakee vaturi avatannyi fya usumanu.

³Uruka luvikywa mbora kwa vandu vafo, Fidooro fya-vayo

⁴Mangyi akapannye vafwafwa, Atarame yewo vakee vaturi, Arumate vandu vakee mbafu.

⁵Mangyi awone muu mwaasha sha nkyeere ukeemika, Na mwiiri ngyeeri na ngyeeri!

⁶Avake mmbwa ikeefweerisa nrema Na mmbwa ikeenisa uruka.

⁷Avikywa mbora kyeeri kyoose kya muu wakwe. Na urilalyi kutani mwiiri wammika,

⁸ashillye kupookya yeeve, kundefika yeeve, Na mura Eufrate kundefika masiiyony a ulana.

⁹Vandu vakee kasa koomu vashemwiinndyaa, Na vakiduva vakwe vashefirya-di mbee yakwe.

¹⁰Vamangyi va Tarshishi, na vamangyi va ngyuruka shidu vashemuutya usanu. Vamangyi va Sheba na Seba vamweengye findo fya pya.

¹¹Vamangyi va ulana loose, mmbo vamwiindyaa, Na vandu va masanga moose vamfurukannye.

¹²Mmbo aniingaa vaturi valya valatiri kindo vakammutereva Na vafwafwa valya valatiri nndu we-veekya.

¹³Mmbo alyillyaa vafwafwa na vaturi; nta nyeenyala yewo vakutiri nawe-fo.

¹⁴Mmbwe awoota efo ushingeny na mavineny, Mashika muu na samu yaawo kwakwe mmbo ivavaa.

¹⁵Mangyi nave na muu mwaasha! Aniingwa saabu na findo fya pyai fyuuka Sheba. Vandu vammbikye fiterewo kyeeri kyoose, Na inkunndya mbora nkonu piti,

¹⁶uruka luvesywa mbora ya shoonga, Mafumbu eeshwe mbora ya fimu sha kulya Lebanoni, Vandu vavikywa mbora vafumbuke muriny sha uruka lwammya mare manuru.

¹⁷Irina lya mangyi lyinganiswa kyeeri kyoose; Umangyi lwakwe lung'aniswa llung'anu. Vandu woose vavikywa mbora Na masanga moose kyeendwa mmbwe.

¹⁸Lurumishe Nndumi Iruva, Iruva wa Israeli, Yeto mwiitana findo fyeeresye.

¹⁹Itumbe lya irina lyakwe lying'aniswa llung'anu! Itumbe lyakwe lyiishwe ulaniny koose.

²⁰Umando lwa fiterewo fya Davidi mwana wa Yese.