Read BIBILLYA Mareiyo Meele a Iruva SABURI 75 Bible Online

SABURI 75 - BIBILLYA Mareiyo Meele a Iruva bible

SABURI 75

¹Lwakwaana, woi Iruva! Mmbo lukeyaamba uniini lwa irina lyafo. Na isununndya vandu kya mirunndye yafo ing'ani.

²Iruva kaamba, “Kwiifo nkonu wa-vayo, Nkonu wa irummbwa mwaandu.

³Uruka lushererema na fyoose fii-fo, Yeny shivangisaa nsuka wa-vayo.

⁴Eni mbafu; shamuvia, ‘Reny ikutuula!’ Na yewo veafinya mulakushobe! Na isaamisa mbembe tany.

⁵Mulakusare, mmbo mukee nnu vandu vatoki, Nta na irera marero a ukushobi.”

⁶Mirumbuye ya usumanu nnyukaa taari ya ngama ao nkwaany-fo, Nta nnyukaa taari ya ndoo ao ya sinde-fo.

⁷Iruva mmbwe lleti; Kautya maata uvingo na vengyi kavalekeiya.

⁸Nndumi Iruva mmbo atiri upata wokony; Lutiri mfinyu unangaa wa unyasi lwakwe, Mmbo asheuleta na valyamari woose mmbo vakeina, Yee mmbo vainaa shoose piny.

⁹Indi yeny mmbo shishefiraa llung'anu; Shishemwiimbya fiimbo we Iruva wa Yakobo.

¹⁰Mmbo ashefishaa mbembe ta vandu valyamari woose, Indi mbembe ta yewo vasumanu mmbo tishaakarwaa.