Read BIBILLYA Mareiyo Meele a Iruva SABURI 79 Bible Online

SABURI 79 - BIBILLYA Mareiyo Meele a Iruva bible

SABURI 79

¹Woi Iruva vandu valakwiishi vantefura uruka lwafo, Wanrindisa mmba yafo sheele, na yaallwa muri wa Yerusalemu uve sama.

²Mmbo valera minying'a ya varundi vafo illiwa ni ndeye, Minyinga ya vandu vafo ive shoonga ya mafisi a ngoroshyony.

³Samu yaawo mmbo ileiritwa sha mura efo muri wa Yerusalemu; Mfo vandu vakee vaalale valatiri vevarika.

⁴Llammba kindo kya sony kwa masanga a nnyanuny. Vamurasa veru mmbo vakee iluseka na ilutatala.

⁵Woi Nndumi Iruva, mmbo kuswaa llung'anu? Unyaasi na kififi kyafo mmbo ing'anaa indo kufike indii?

⁶Pusuya vandu valakwiishi unyaasi lwafo Ee, ushilyi loose lulashiindya irina lyafo.

⁷Mashika mmbo valemira vandu vafo wa mmba ya Yakobo, Mmbo valemamita deny ando akwe kwekaa.

⁸Kulesheilukapa kimaruma kya marekwa a vamiku veru-fo! Lusheywa ni isarya lyafo uviny-dwa, Mashika mmbo lukee valammyi kyuumu!

⁹Woi Iruva, Nkira weru llweekye! Kwa wiindi lwa irina lyafo, Kulukire na ilusarya ngyulyamari teru kwi irina lyafo.

¹⁰Nkyiki vandu va masanga valuvye, “Nkwi Iruva wany akai?” Lweekye lulollye kwivataiya vandu ewo, valepuswa samu ya vandu vafo,

¹¹Kyiiyo kya vafingwa ewo kyikufikye. Finya yafo ikire yewo vakee vautye uvingo lwa iwaawa.

¹²Woi Nndumi Iruva, vataiye vakiduva yewo mfungare ka mfungare, Firumwa valelwaarara vandu ewo va masanga va nnyanuny.

¹³Neese vandu vafo, mmbo lukee moonri a ironda lyafo, Lushekwaana llung'anu na ikwaarafuma fyeeri fyoose.