Read BIBILLYA Mareiyo Meele a Iruva SABURI 80 Bible Online

SABURI 80 - BIBILLYA Mareiyo Meele a Iruva bible

SABURI 80

¹Loota kurwi kyafo ewe mwiisa Israeli, kuteteraa vana va Yosefu sha mooonri, Yewe kukee uwe ya fyuumbe efyo fiwangwaa, makerubi lumikye,

²koore kumuni kwa vandu va Efraimu, Benyaminy na Manase. Loore finya tafo, osho kulukire

³Woi Iruva kuluviire Lumikye na usangu lwafo, neese lushekyaa!

⁴Woi Nndumi Iruva wa matorito, Kumande indii kwiswaa fiterewo fya vandu vafo?

⁵Mmbo kwa lwa fyoova five shoonga yeeru Kwallurita misoru miingyi.

⁶Mmbo kwalwal teve ya mwaandu kwa vaamurasa veru. Vakiduva veru mmbo vakee ilutatala.

⁷Woi Iruva wa matorito, kuluviire, Lumikye na usangu lwafo, neese lushekyaa.

⁸Mmbo kuleende msabibu wuuka Misri; Koombuta-fo vandu va masanga engyi, kwavaakya-u msabibu wafo.

⁹Kwauremya ukooye ing'ana, Nato ukauta miraari ikakwaana urukeny koose.

¹⁰Mmbo kulesikya mafumbu na kirishe kya vayo; Na marambaa avayo akava sha miri myaasha Miniini ivangwaa mieresi

¹¹Maramba a vayo akalambara akafika yeeveny, Na maa ta vayo tikakwaana fika mbai ya mura wa Efrati.

¹²Nkiki kusemmbwa isimamba elyo lleuringitye? Ulalu wo umwi akee iira-u mmbo akee idova ndunda ta msabibu.

¹³Nguve ta ngoroshyony mmbo tikee ulyamara. Kiwo na mafisi a ngoroshyony mmbo akee iurafuna.

¹⁴Woi Iruva wa matorito, lwiinndukye, Lola kwikee efo iruveu, kulle, Kusheivavara nsabibu eto.

¹⁵Kuringe moorwa kuleuvaaya kwa woko lwafo, Maa eyo kuleikarisa Yewe kumuni.

¹⁶Vakiduva veru mmbo valeukora na muro na yuumanya si. Valle kwa unyaasi, varumake.

¹⁷Kyira na iringa nndu eto kulensauwa, eto kulensauwa kwa kimaruma kyafo.

¹⁸Neese llushekuraa lyingyi-fo, nta ivuya numa-fo. Luviirye muu, neese lushekwaafumaa.

¹⁹Woi Nndumi Iruva, Iruva wa matorito luviire kwafo mmbe, Lumikye na usangu lwafo, neese lushekyaa.