Read BIBILLYA Mareiyo Meele a Iruva SABURI 81 Bible Online

SABURI 81 - BIBILLYA Mareiyo Meele a Iruva bible

SABURI 81

¹Kapeny Iruva wa Yakobo ukoru.

²Oniseny kiimbo kya ifura, kapeny ngoma. Kapeny sese na fivale fya unyanga usha.

³Kapeny tarumbeta imanyisya ifuma lya mwiiri Na elyi mwiiri wasimbika kyeeri kya sukukuu tany.

⁴Elo lo uramba kunu Israeli; Elyo lyo ivavasyo lya Iruva wa Yakobo.

⁵Alenniingya vandu va Israeli ivavasyo elyo Lya alekapa uruka lwa Misri. Shiitye unyanga shilakee ilumanya nisha lushambaa,

⁶“Yeny mmbo shilekurwa Mario afo meeveny; Shakuuta matofari kwerye maakony.

⁷Kwekee ukiveny kuleshivaanga, neny shakukyira; Shelekurouwa shikusurumyi efo iruruminy. Shilekweesa kulya mureny wa Meriba.

⁸Yeni vandu vakwa aranyiny wiikimbi lwakwa, Woi Israeli, a nkyema kweshiiranyaa!

⁹Kwafo kulashekaa-fo iruva yeny-fo; Nta kulasheindya iruva lyingyi-fo.

¹⁰Yeny mmbwe Nndumi Iruva, Iruva wafo, Shilekuuta kulya urukeny lwa Misri, Tarambwa kana shikuniinge shoonga.

¹¹Kya indi vandu vakwa mmbaleshaaranya-fo. Israeli nyaleshikunda deny-fo.

¹²Naasa shavara vasae na nriya wawo, Valatye mbony tawo veni.

¹³A nkyema vandu vakwa veshaaranyaa! A kyema Israeli elatya shia takwa!

¹⁴Mmbo shevinga vakiduva wawo uviny! Mmbo sheorwa woko shikape vakiishi vawo!

¹⁵Yewo vashisuuye mmbo veshifirya ndi kwa werei; Na ngapo yaawo ive ya llung'anu.

¹⁶Indi yewe mmbo shilekulela na nganu shisha. Mmbo shekuvuutisa na ukyi lwa mbakony.”