Read BIBILLYA Mareiyo Meele a Iruva SABURI 83 Bible Online

SABURI 83 - BIBILLYA Mareiyo Meele a Iruva bible

SABURI 83

¹Woi Iruva kulamalallye-fo, Woi Iruva kulakae sau-fo, nta iimuya-fo!

²Lola-te, vakiduva vafo mmbo vakee iruya mwaandu? Ewo wakusuye mmbo vakee ipoo kya kinyala?

³Mmbo vakee ikudeesya kwa ntambo ivavisa vandu vafo, Mmbo vakee irera ukasha uwe ya yewa kuvaringaa.

⁴Vakaamba, “Oshony, lurumate isanga elyo, Naambo irina lya Israeli lyilashekumbuwa lyingyi.”

⁵Ee, mmbo vakee ivikyana kwa nrima umwi. Mmbo vakee ilya mboo uwe yafo

⁶Vandu va Edomu na Vaishmaeli, Vamoabu na vandu va Hagari,

⁷vandu va Gebali, Amoni na Amaleki Vandu va Filistia na yewo vakaa Tiro.

⁸Naakwa ni Ashuru mmbo valeakana nawo, Mmbo valekulunga na vana va Loti.

⁹Vatanyi kilya kuletannya vandu va kulya Midiani Shaasa kuletannya Siseva na Yabini kulya usokeny luvaangwa Kishoni,

¹⁰vandu kulevarumata kulya Edori, Vakava mbulula uwe ya uruka.

¹¹Kutannyi vanini vawo shaasa kuletannya Orebu na Seebu. Na vashilyi vawo woose shaasa kuletanya Seba na Salmuna,

¹²Ewo valeamba, “Mmbo lushiipoo uruka lukee masaa a Iruva!”

¹³Woi Iruva wakwa, waalwe kilulyi, Vave sha muulu uvivitwaa ni uraato.

¹⁴Sha elyi muro warumata nturi Na ngyulumi ta muro tikee yongorisa mafumbu,

¹⁵kuvarishise kwa uraato lwafo uniini lwa finya, Kuvaeese na kitita si kyafo!

¹⁶Fisangu fyawo fisikywa ni usutu, Naambo vakooye ikuruuya yewe Nndumi Iruva.

¹⁷Valollye usutu na ifwaiya kyeeri kyoose Usutu lwawo luvarumate.

¹⁸Vamanyi shelyi yewe kumuni mmbwe Nndumi Iruva Ni Yewe Iruva nniini uwe ya ulana loose.