Read BIBILLYA Mareiyo Meele a Iruva SABURI 88 Bible Online

SABURI 88 - BIBILLYA Mareiyo Meele a Iruva bible

SABURI 88

¹Woi Nndumi Iruva, Iruva wa ukiro lwakwa, Mmbo shiyya mbee yafyo nsanyiny na kio.

²Fiterewo fyakwa five mbee yafo; Kaarwi kyafo kyaarannyi kiiyo kyakwa.

³Mashika muu wakwa wammbuura ukiva, Na muu wakwa wafikya kufii ifwa.

⁴Nshikee ilollywa sha nndu afiyye, Finya takwa tanshisiya toose.

⁵Nshikee mwere nnang'ani a vafu, Sha yewo valewawa, vakee efo fifuny. Yewo yewe kulawakumbuye lyingyi, Vammbikwa kwaasha na uringyi lwafo.

⁶Yeny mmbo kwashaara irininy yaasha, Irininy ando kutiri ireema.

⁷Unyafi lwafo lwashirovya; Mmbo shikee llamyi ni matundulu a unyafi lwafo.

⁸Mmbo kwashirauwa na mbuya takwa; Kwashallwa kindo kya iswa ni wo, Mmbo shikee mfingye mmba, nta nshidimaa irisha-fo.

⁹Miso akwa amfumba kimaruma kya fyoova. Nndumi Iruva shikee ikufuuya wo nkonu, Shikee ikooroya maako akwa.

¹⁰A mmbo kutanaa ngyende kimaruma kya vafu? A vafu vashesalalaa vakwaarafumi?

¹¹A illyillya lyafo mmbo lyisheambawaa efo kifuny? A usaari lwafo lusheambawaa efo kifuny?

¹²A ngyende tafo mmbo tishemanyikaa efo ireeminy? Ao usumanu lwafo lushemanyikaa kwa yewo valenrekyeka?

¹³Indi yeny mmbo shikee ikufuuya Yewe, Nndumi Iruva. Na fiterewo fyakwa mmbo fikusheya ngaminy.

¹⁴Nndumi Iruva nkyiki kukee yeera sakyeny muu wakwa? Na ishisuruma kisangu kyafo?

¹⁵Mmbo shhilelyiswa ukiva shafika afii na ufu. Kupookya ukoony lwakwa.

¹⁶Mmbo shambira viri, kyuuka watariso lwafo. Fyeereso fikashimamita.

¹⁷Yefyo fikashiringotya sha mura nsanyiny myoose. Fikashishingillya amwi fyoose.

¹⁸Nkuleshirauwa na mbuya na wooroye vakwa; Ireema lyo lyava urooye wakwa.