Read BIBILLYA Mareiyo Meele a Iruva SABURI 89 Bible Online

SABURI 89 - BIBILLYA Mareiyo Meele a Iruva bible

SABURI 89

¹Mmbo nshiimba ilyillya lya Nndumi Iruva llung'anu! Kana kyakwa mmbo kyishevyaa marika moose usaari lwafo.

²Mashika mmbo shaamba, Ilyillya lyafo lyiiyo llung'anu. Usaari lwafo llwa llung'anu sha ngina.

³Kwaamba, “Mmbo shavika mma na nsauwe wakwa, Mmbo shilellyiya nndundi wakwa Davidi mboo.

⁴‘Ngyeeri yafo nsheiselesaa llung'anu; Kitima kyafo kya umangyi kishekaa-u llung'anu.’”

⁵Woi Nndumi Iruva, ngina tishaarafumaa nngyende tafo Na usaari lwafo efo ikwaanuny lya veele.

⁶A mmbi efo iruvee-u amanyaa inaniswa na Nndumi Iruva? A mmbi avakye Nndumi Iruva nnang'ani a vasu?

⁷Iruva mmbo eereywa nnu efo ikwaanuny kya veele. Ni wa yerewa mmwasi ngota yewo vanringitye.

⁸Nndumi Iruva, Iruva wa matorito! Woi Yaave, mmbi akee nkaari sha Yewe? Na usaari lwafo llukuringitye.

⁹Mmbo kushilyaa finya ta yeeve. Kyeeri yarosa matundulu, Yewe kwaaferisa.

¹⁰Nyewe kwepeeta nrwe va shoka ilya Rahabu, kwaiwaa. Woko lwafo lwa finya lukutarakanisa vakyiduva vafo.

¹¹Ngina ni masaa afo, nalo uruka ni masaa afo; Uruka loose na efyo fiishwe-fo, Nyewe kulevika-u uvasha lwa vayo.

¹²Taari ya ndoo na sinde, nyewe kuleumba. Mafumbu a Tabori na Hermoni akee ikwaarafuma kwa ifura.

¹³Woko lwaafo ni woko lutiri wiidimi! Woko lwafo lutiri finya! Woko lwafo usha lilemaarafumwa!

¹⁴Usumanu na udede mfyo uvasha lwa umangyi lwafo, ilyilya na usaari mfyo fikee ikwiirya mbee.

¹⁵Ngoma vandu valya veeshi ikurumisha Yewo vakee yeenda seny ya kisangu kyafo.

¹⁶Kwa irina lyafo mmbo vafura nsanyiny moose. Kwa usumanu lwafo vakakung'anisa.

¹⁷Mashika utore lwa finya tawo ni Yewe. kwii ilyillya fyafo mmbo luvingaa.

¹⁸Mashika ngoo yeeru ni Nndumi Iruva, Na umangyi lweru ni lwakwe we Mweele wa Israeli.

¹⁹Llyony kulevia veele vefo wa yoorya, Kwaamba, “Shileniingya yeto atiri finya ngarami. Shilenganisa yeto alesauwa nnang'ani a vandu.

²⁰Shilelollya nndundi wakwa Davidi. Shilemwaamba mafura akwa meele.

²¹Yeto woko lwakwa luvaa na ikaari uwe kwakwe, Na woko lwakwa lunningaa finya.

²²Nkyiduva nnyashensisya-fo, Nta mwana wa uravi nnyashellyisaa ukiva-fo.

²³Indi mmbo nshekapaa vakyiduva mbee yakwe Shishekapaa yewo vansuuye.

²⁴Mmbo shinkundaa deny, usaari na ilyillya lyakwa fikee nave, Na kwa irina lyakwa mmbo avikyoo mbora.

²⁵Mmbo mmbikaa woko lwakwe uwe ya yeve Na woko lwakwe usha uwe ya mira.

²⁶We mmbo ashivaangaa, ‘Yewe ni baba wakwa Iruva wakwa na mbanga ya ukiro lwakwa.’

²⁷Neeny shishemwiiikya ave mwana wakwa wa urisasi, Ave uwe nnu ngota Vamangyi wa ulana.

²⁸Mmbo shinniinga ilyillya lyakwa llung'anu; Na mma yakwa mmbo shiivikaa kya dede kwakwe.

²⁹Udeena lwafo shisheluseleesau llung'anu; Na kitima kya umangyi lwakwe mikonu myoose sha ngina.

³⁰Vana vafo vakara vatira mavavasyo akwa Vakara yeenda na udede lwakwa,

³¹Vakarekkywa mavavasyo akwa Vakara itira mavavasyo akwa,

³²Llyony shishevakapaa mbiri kya marekyo awo, Na uravi lwawo kwa ngapo.

³³Indi ilyillya lyakwa nshillutaa kwakwe-fo, Nta nshishallwa usaari lwakwa luve wongo-fo.

³⁴Yeny nshisherekywaa mma yakwa-fo; Nshishalashaa irero lyauka kaniny kakwa-fo.

³⁵Irero lyimwi shalyiya mboo ya veele lwakwa, Nkyisumani nshishevia Davidi wongo-fo

³⁶Ngyeri yakwe ikaa-u llung'anu; Na kitima kyakwe mmbo kyivakaa mwi mbee yakwa,

³⁷Kitima kyakwe mmbo kyikaa-u llung'anu sha mwiri, Nkureekyi nsaari akee ireveu!”

³⁸Kya indi Yewe kwamweera sakyeny na illema. Kwannyasika uwe ya mesiya wafo.

³⁹Mma ya nndundu wafo mmbo ilekwengye iswa, Mmbo kulerindisa ureto lwakwe.

⁴⁰Nkulewundwa mifiri yakwe myoose Kwaallwa turuve takwe tikava sama.

⁴¹Yewo woose vashiira shia mmbo vepoo masaa akwe Ammba mwiteendwa ni vannyanuny vakwe.

⁴²Mmbo kwannganisa woko usha lwa vakyiduva vakwe Kwafurisa woose ewo vamushuiye

⁴³Lingyi mmbo kuleallwa usu lwakwe utushu Nta nkulemweenya ikapana fireny-fo.

⁴⁴Mmbo kulemandisa usuri lwakwe Kitima kyakwe kya umangyi nkulekyeera sumbai.

⁴⁵Nkuleangura mikonu ya ukoo lwakwe Kwansikya na usutu.

⁴⁶Woi Nndumi Iruva, a kufike indi? Nkukusurumaa llung'anu? A unyafi lwafo mmbo lushaakaa sha muro fika indii?

⁴⁷Kummbwa shaasa yeny shilakee mwiisinda-u A mmbo kuleumba ufyari lwa vana va vandu kya ruu!

⁴⁸Ni nndu ungau wa womi ashekaa-u nalafwaa. Asheturunyaa muu wakwe na finya ta ufu?

⁴⁹A Nndumi Iruva ilyillya lyafo lya mapookyony nkwi lyikai? Elyo kulelyisya Davidi mboo kya usaari lwafo.

⁵⁰Woi Nndumi Iruva, kummbwa shaasa varundi vafo vakee iinyalwa! Shaasa shisisirye fyaararo fya vandu veengyi yewo valakwiishi.

⁵¹Woi Nndumi Iruva, vakyiduva vafo vakee iteenda; Ee-da, vakee iteenda mesiya wafo wo ando asheendaa.

⁵²Nndumi naarafumwa llung'anu! Amen amen!