Read BIBILLYA Mareiyo Meele a Iruva SABURI 9 Bible Online

SABURI 9 - BIBILLYA Mareiyo Meele a Iruva bible

SABURI 9

¹Woi Nndumi Iruva; shakwaana na ngoo yakwa shoose! Shishaamba mbony ta mashora afo moose a wende.

²Mmbo nshefura na ikwaarafuma Yewe, Mmbo nshiimba kya iitikisa irina lyafo.

³Vakiduva vakwa vakawuya numa, Vakawonisa nsindaraa wakamamika mbee ya usanguny lwafo

⁴Kwakureeka ando akwa na ishitannya usumanu, efo kitiminy kya ushilyi kwashirumbuya kya usumanu

⁵Kwakyeemya vamasanga, kwarumata valyamari vakamamika llung'anu na llung'anu.

⁶Vakiduva veru vakamanda na irewa ngwera llung'anu, na miri yawo kwaillwa nta ilakikumbuwa lyingyi.

⁷Indi Nndumi Iruva ashillyaa llung'anu, akee ideesya kitima kyakwe kya umangyi narummbwe mwaandu.

⁸Ushilyi na mirumbuye yakwe ni ya usumanu. Masanga moose kaarumbuya kya usumanu.

⁹Nndumi Iruva ni kirishyony kya eto akeemfote, kirishyony kyeeru kyeeri kya ngatara.

¹⁰Valya vakwiishi vakakusirya kwafo, mashika nkulemmyi nta umwi eto akuruuya-fo.

¹¹Arafuma Nndumi Iruva yeto mwishillya Sioni, masanga moose namanyi mashora akwe.

¹²Iruva mmbo akeemwitaiya kiduva kya vepuswa samu; nta nalarekywa kiiyo kya vanana.

¹³Woi Nndumi Iruva kushilyillye, lola valya vashisuuye findo vakeshitannya, Ewe mwishikira ngatara ta ufu.

¹⁴Neeny shaambe usha lwafo loose, efo muriny wa vefu va Sioni, neeny shifure kya ukiro lwafo.

¹⁵Vandu va masanga vammbwa efo kiroriny valekisuma wo veni na nreiyo valeureiya ukatira marende awo.

¹⁶Nndumi allollya paa efo mashoreny akwe, na vandu valyamari vakamanyika kyuuka na mirundye a maako akwe.

¹⁷Kya valyamari woose mmbo vashemamitwaa, yewo woose valema shia ya Iruva.

¹⁸Kya-indi yewo vaturi nnyashevarekywaa-fo na vafwafwa woose mmbo vafuryaa nsia waawo

¹⁹Kwipoo woi Nndumi Iruva, Kuvaimi finya yewo vakutuula kurummbwe myaandu ya masanga moose.

²⁰Woi Nndumi Iruva woore wende lwafo, naambo wakooye imanya sheelyi Wo ni vandu tupu.