Read BIBILLYA Mareiyo Meele a Iruva SABURI 96 Bible Online

SABURI 96 - BIBILLYA Mareiyo Meele a Iruva bible

SABURI 96

¹Imbyeny Nndumi iruva, kiimbo kiiya! Imbieny Nndumi Iruva, uruka loose!

²Imbieny Nndumi Iruva, na yaarafuma irina lyakwe. Vambiseny ukyiro lwakwe mikonu myoose.

³Ongoyeny vandu va masanga mbony ta Weele lwakwe. Vieny vandu woose mbony ta ngyende takwe.

⁴Mashika Nndumi Iruva ni nniini yaarafumwa nnu! Na wa yeerewa ngota maruva moose.

⁵Mashika maruva moose a vandu nshe kindo-fo, Indi Nndumi Iruva mmbwe aleumba ngina.

⁶Wiidi na itumbe mfikee usanguny lwakwe; Finya na usha mmbo fikee ando eele kwakwe.

⁷Niingeny Nndumi Iruva, yeni mmba ta vandu; Niingeny Nndumi Iruva weele na finya.

⁸Niingeny Nndumi Iruva weele lwa irina lyakwe! Endeny firaso mwaange poo takwe.

⁹Indyeny Nndumi Iruva kwa usha lwa weele. Uruka loose lureremi usanguny lwakwe.

¹⁰Rereny efo kwa vandu va masanga sheelyi Nndumi Iruva akee ishillya. Ee-da ulana lukee waakare lluringinaa-fo. Mmbo asheletaa vandu kwa worotu.

¹¹Ngina tifure, uruka lukape ndoro! Yewe ndilyi amwi na fyoose fiishwe-fo!

¹²Marema nakape ndoro amwi na fyoose fiifo! Miri myoose iimbe kwa ifura

¹³Mashika Nndumi Iruva akee isha! Ee, mashika akee isha iutya uruka uvingo! Ashiutya ulana uvingo kwa usumanu Na vandu va masanga kwa usaari lwakwe.