Read BIBILLYA Mareiyo Meele a Iruva FYAASO 13 Bible Online

FYAASO 13 - BIBILLYA Mareiyo Meele a Iruva bible

FYAASO 13

¹Mwana atiri urango usha mmbo araannya kindo ndeye ambyaa, Indi nndu wa kiila n nyaaranyaa wikimbi-fo.

²Nndu nsaari mmbo awona mesha kyeendwa ni marero akwe, Indi valembi mmbo vasindaa na uriiti.

³Mwikalya kana kyakwe mmbwe akira muu wakwe, Mwirera ree mmbo akwengyee urumato.

⁴Nndu nroko mmbo alangaa llyo nta kindo awonaa-fo, Indi mwikutakura we mmbo awonisaa shoonga shiingyi,

⁵Nndu nsaari mmbo asuuye wongo; Indi nravi mmbo arundaa fya usutu na upeere.

⁶Usaari lluringaa yewo vatiri myeenngye myoorotu, Indi ulyamari llutuula varavi.

⁷Vandu vengyi mmbakulollyaa sheelyi mbatiri masaa indi nta kindo vatiri-fo; Vengyi vakulollyaa nfingwera lyo mbatiri masaa shapu.

⁸Isimba llikuringaa na masaa a vayo, Indi ngwera nnyitiri kyereso-fo.

⁹Nndu nsaari mmbo amikaa paa sha kyimwii Indi varavi vavakye taa ikeerumika.

¹⁰Umbafu mmbo lwendee mwaandu; Indi yewo veirikya kindo vavywaa vatiri urango usha.

¹¹Masaa a rabu rabu mmbo amamikaa uviny; Indi yeto asanyiryaa kwa waallyo akaingifwa.

¹²Ivika nsia kya werevere llivavisaa ngoo, Indi ikusirya kya dede, llivakye nri wa muu.

¹³Mwiinyala mavavaso mmbo akweengye urumato, Indi mwiindya mavavaso aniingwa kya pya.

¹⁴Ufundo lwa vandu vatiri urango usha lluvakye usoka lwa muu; Llushidimisya nndu ikaa kwaasha na mireiyo ya ufu.

¹⁵Iva na urango mmbo kweendee iviiri; Indi shia ya uravi nnya ukiva.

¹⁶Nndu ntele mmbo atanaa wo kindo na urango; Indi nrung'ani mmbo araaraa na urung'ani lwakwe.

¹⁷Nrumi nkasha mmbo aolotaa vandu ukiveny, Indi nrumi nsaari mmbwe endee ng'waana.

¹⁸Ungwera na ukiva lluwoyaa yeto alalangye ufundo; Indi mwiarannya ufundo mmbo ashiindyoo.

¹⁹Mmbo kyeendee nsia iwona kilya kulangye, Kwa yekyo varung'ani mmbo vasuuye iiyama uravi.

²⁰Mwikunanavia na vatiri urango usha mbaonisaa urango usha; Indi mwikulunga na marung'ani mmbo awoyo n renga.

²¹Vetana ulyamari makasha n nyavasoraa, Indi vasaari vasimbwaa mesha.

²²Nndu nsaari mmbo areeya ngyeeri yakwe ding'u, Indi masaa a nndu llyamari mmbo aniingywa nndu nsaari.

²³Nnda wa ngwera mmbo uvikaa fimu fiingyi, Indi kasokwa kilakee kya usumanu.

²⁴Nndu nalakyemyaa mwana wakwe nnyankunndye-fo; Indi nndu akundye mwana wakwe mmbo amwiikyimbaa uviny.

²⁵Nndu nsaari atiri shoonga timfye, Indi ndeu ya nravi mmbo isiswa nshaa.